Ein­kunnir Ís­lands: Fyrir­liðinn bestur í annars erfiðum leik

Jóhann Berg var duglegur varnarlega og fékk tvö bestu færi Íslands í leiknum. Það fyrra kom í fyrri hálfleik en þá átti hann skot með úr þröngu færi með sínum verri fæti sem Manuel Neuer varði í marki Þýskalands.

Í þeim síðari átti hann bylmingsskot sem small í stöng. Albert Guðmundsson fylgdi eftir og skoraði en var dæmdur rangstæður. 

Þá var Ísak Bergmann Jóhannesson sprækur framan af og óhræddur að takast á við magnaða leikmenn þýska liðsins. Þórir Jóhann Helgason var einnig sprækur en hann byrjaði óvænt á vinstri væng Íslands.

Skiptingar Arnars Þórs Viðarssonar landsliðsþjálfara komu seint og skiluðu því miður ekki jafn miklu og gegn Norður-Makedóníu. 

Hér fyrir neðan má sjá einkunnir íslensku leikmannanna fyrir leikinn í dag.

Byrjunarlið Íslands

Hannes Þór Halldórsson, markvörður 6

Gat lítið sem ekkert gert í mörkunum (missti samt boltann klaufalega í aðdraganda þriðja?). Varði vel frá Leon Goretzka um miðbik fyrri hálfleiks og vel frá Timo Werner í upphafi þess síðari.

Birkir Már Sævarsson, hægri bakvörður 4

Átti einkar erfitt uppdráttar í upphafi leiks þar sem hann var berskjaldaður gegn Leroy Sané. Var svo ekki nægilega nálægt Sané þegar sá vængmaðurinn skoraði þriðja mark Þjóðverja.

Brynjar Ingi Bjarnason, miðvörður 5

Komst ágætlega frá leiknum miðað við aldur og fyrri störf. Átti vissulega í vandræðum en leit betur út en margir mun reyndari leikmenn.

Jón Guðni Fjóluson, miðvörður 4

Virkaði frekar týndur í fyrsta marki gestanna og átti almennt frekar erfitt uppdráttar.

Ari Freyr Skúlason, vinstri bakvörður 5

Ágætur framan af. Lítið svo sem hægt að setja út á hans frammistöðu en virkaði mjög þreyttur í síðari hálfleik eins og aðrir leikmenn liðsins. 

Guðlaugur Victor Pálsson, djúpur miðjumaður 4

Eyddi miklum tíma í að rífast við Joshua Kimmich en það var líklega í eina skiptið sem hann komst nálægt miðjumönnum þýska liðsins.

Birkir Bjarnason, miðjumaður 5

Birkir virkaði þreyttur frá upphafi til enda. Langt því frá hans besti leikur og átti eins og aðrir miðjumenn Íslands erfitt uppdráttar gegn ógnarsterkri miðjugestanna.

Ísak Bergmann Jóhannesson, miðjumaður 6

Sprækur fram á við. Átti fast skot sem Manuel Neuer kýldi út í teiginn. Átti ekki mikla möguleika á miðsvæðinu gegn ógnarsterkri miðju Þjóðverja en lét finna fyrir sér. Hans besti A-landsleikur til þessa.

Þórir Jóhann Helgason, vinstri vængur 6

Vann vel og reyndi hvað hann gat. Stóð sig ágætlega eftir að hann var færður inn á miðjuna í síðari hálfleik.

Jóhann Berg Guðmundsson, hægri vængur (fyrirliði) 7

Fyrirliðinn átti fínan leik. Vann vel til baka og var einkar óheppinn þegar þrumuskot hans small í stönginni í síðari hálfleik. Fékk fínt skotfæri í fyrri hálfleik, því miður með hægri fæti og Manuel Neuer varði.

Albert Guðmundsson, framherji 6

Vann vel til baka framan af leik, vann boltann og bjó til þessar fáu sóknir sem Ísland fékk í leiknum. Hvarf í síðari hálfleik er tankurinn var einfaldlega búinn hjá íslenska liðinu.

Varamenn

Arnór Sigurðsson kom inn fyrir Ísak Bergmann á 70. mínútu 5

Gerði lítið.

Jón Dagur Þorsteinsson kom inn fyrir Jóhann Berg á 70. mínútu 5

Gerði vel um leið og hann kom inn á en Ísland eyddi svo restinni af leiknum í skotgröfunum.

Andri Lucas Guðjohnsen kom inn á fyrir Albert á 80. mínútu 

Spilaði ekki nægilega mikið til að fá einkunn.

Andri Fannar Baldursson kom inn á fyrir Guðlaug Victor á 89. mínútu

Spilaði ekki nægilega mikið til að fá einkunn.