Bandaríski flugherinn æfir við Ísland næstu daga

Samkvæmt tilkynningu Landhelgisgæslunnar munu tvö hundruð liðsmenn bandaríska flughersins taka þátt í verkefninu. Flugherinn muni hafa tímabundið aðsetur á öryggissvæðinu á Keflavíkurflugvelli.

Kvikmyndatökumaður Víkurfrétta náði myndbandi af komu vélanna í kvöld.

Æfingarnar muni gefa bandarísku flugsveitinni tækifæri til að kynnast staðháttum á Norður-Atlantshafi, þar með talið hér á landi og til að æfa með öðrum þjóðum Atlantshafsbandalagsins. Samskonar æfingar fari fram reglulega í Evrópu, síðast hér við land í mars.

Þá segir að eins og með annan erlendan liðsafla sem hér á landi dvelur tímabundið þá sé í gildi viðbúnaður vegna sóttvarna meðan á dvöl bandarísku flugsveitarinnar stendur og sé framkvæmdin unnin í samvinnu við embætti landlæknis og aðra sem að sóttvörnum koma hér á landi.