Erlent

Dæmdur fyrir morðið á þrettán ára syni sínum

Elma Rut Valtýsdóttir skrifar
Mark Redwine var í dag dæmdur fyrir morðið á þrettán ára syni sínum árið 2012.
Mark Redwine var í dag dæmdur fyrir morðið á þrettán ára syni sínum árið 2012. AP/Jerry McBride

Mark Redwine var í dag dæmdur fyrir morðið Dylan Redwine, þrettán ára gömlum syni sínum. Dylan hvarf sporlaust árið 2012, skömmu eftir að hann hafði fundið myndir af föður sínum í kvenmannsnærfötum að borða saur upp úr bleyju.

Atvikið átti sér stað í bænum Durango í Colorado fylki í Bandaríkjunum. Málið vakti athygli á heimsvísu þegar Mark og móðir Dylans, Elaine Hall, komu fram í sjónvarpsþætti Dr. Phil árið 2013 þar sem þau beindu ásökunum að hvoru öðru.

Móðir Dylans kveðst hafa sent drenginn til föður síns þann 18. nóvember árið 2012 og frétt daginn eftir að hans væri saknað. Hana grunaði þó fljótt að faðir hans hefði haft eitthvað með hvarf hans að gera.

Mark tjáði lögreglu að hann hefði skilið Dylan eftir einan heima meðan hann fór að útrétta. Þegar hann kom heim hefði Dylan verið horfinn sporlaust. 

Saksóknari í málinu taldi Mark hafa fengið ofsareiðiskast eftir að Dylan fann myndir af föður sínum í kvenmannsnærfötum að borða saur upp úr bleyju. Eldri bróðir Dylans staðfesti að Dylan hafði fundið þessar myndir rétt áður en hann hvarf.

Mark vildi þó ekki meina að þessar myndir tengdust hvarfi Dylans, heldur væri líklegra að hann hefði orðið birni eða fjallaljóni að bráð.

Það var svo árið 2013 sem líkamsleifar Dylans fundust skammt frá heimili föður hans og fannst höfuðkúpa hans tveimur árum seinna.

Áverkar á höfuðkúpunni bentu til þess að honum hefði verið ráðinn bani með hníf eða öðru beittu vopni. Þá hafði blóð úr Dylan fundist inni í stofu hjá Mark og fann leitarhundur ummerki um drenginn aftan í bifreið hans.

Mark sýndi engin viðbrögð þegar dómur var kveðinn í dag.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.