Grábjörn dró konu úr tjaldi og drap hana

Björninn drap konuna á þriðjudagsmorgun. Þá var það í annað sinn sem hann hafði komið á tjaldsvæðið sem hópurinn var á. Björninn er sagður hafa verið um 180 kíló að þyngd og hefur verið reynt að finna hann og fella en án árangurs.

Ovando er lítill og vinsæll ferðamanna- og útilegustaður sem var gerður frægur í myndinni „A River Runs Through It“ frá 1992 eftir Robert Redford, með Brad Pitt í aðalhlutverki.

AP fréttaveitan segir um þúsund hjólreiðamenn fara í gegnum bæinn á ári hverju auk annarra ferðamanna og margir tjaldi þar.

Samferðamenn Lokan segja að þau hafi vaknað við björninn um klukkan þrjú, aðfaranótt þriðjudagsins. Hann hafi komið á tjaldsvæðið en ráfað fljótt á brott. Þau fjarlægðu þá öll matvæli úr tjöldum þeirra og fóru aftur að sofa.

Skömmu eftir klukkan fjögur um nóttin barst fógeta Ovando tilkynning um að björn hefði ráðist á konu á tjaldsvæðinu. Aðrir gestir þar urðu varir við árásina og notuðu sérstakan bjarnarúða til að reka björninn á brott.

Síðan þá hefur bjarndýrsins verið leitað úr lofti og á jörðu niðri, auk þess sem gildrur hafa verið lagðar. Þrátt fyrir það hefur dýrið ekki fundist en búið er að finna lífsýni úr birninum sem hægt yrði að bara saman við birni sem enduðu í gildrum en veiðiverðir telja sig geta þekkt björninn frá upptökum úr öryggismyndavélum.