Erlent

Ný mótefnameðferð gegn Covid-19 gefur góða raun

Hólmfríður Gísladóttir skrifar
Meðferðin hefur gefið góða raun en hún kostar sitt; á bilinu 170 til 340 þúsund krónur.
Meðferðin hefur gefið góða raun en hún kostar sitt; á bilinu 170 til 340 þúsund krónur. epa/Andy Rain

Vísindamenn segja nýja mótefnameðferð munu bjarga lífi sex af hverjum hundrað sem fá meðferð vegna alvarlegs sjúkdóms af völdum kórónuveirunnar, SARS-CoV-2.

Niðurstöður svokallaðrar Recovery-rannsóknar benda til þess að meðferðin gæti hjálpað einum af hverjum þremur sem leggjast inn á sjúkrahús með Covid-19. Lyfin ætti hins vegar aðeins að nota á þá sem hafa ekki myndað eigin mótefni gegn veirunni.

Lyfjakokteillinn, sem er framleiddur af Regenoron, bindur sig við veiruna og kemur í veg fyrir að hann smiti frumur og fjölgi sér. 

Rannsóknin náði til um 10 þúsund einstaklinga á Bretlandseyjum sem voru lagðir inn vegna Covid-19. Meðferðin reyndist draga úr líkum á dauða, stytta sjúkrahúsvistina um fjóra daga að meðaltali og draga úr líkum á því að setja þyrfti sjúklinginn á öndunarvél.

Martin Landrey, annar tveggja sem fóru fyrir rannsókninni, sagði meðferðina hafa minnkað líkurnar á dauða um fimmtung. Meðferðin var notuð samhliða steralyfinu dexamethasone, sem hefur reynst minnka áhættuna á dauða um þriðjung hjá veikustu Covid-19 sjúklingunum.

Niðurstöðurnar eru sagðar sérstaklega ánægjulegar í ljósi þess að aðrar mótefnameðferðir hafa ekki gefið jafn góða raun, til að mynda meðferðir þar sem sjúklingum var gefinn blóðvökvi úr einstaklingum sem höfðu náð sér af Covid-19.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×