Fótbolti

Utan vallar: Guð­dóm­legur réttur þeirra ríku til að verða ríkari

Runólfur Trausti Þórhallsson skrifar
Joel Glazer [t.h.] er varaformaður „ofurdeildar“ Evrópu. Með honum á myndinni er bróðir hans, Avram Glazer.
Joel Glazer [t.h.] er varaformaður „ofurdeildar“ Evrópu. Með honum á myndinni er bróðir hans, Avram Glazer. Getty Images

Hvað gerist ef þú lokar hóp af moldríkum miðaldra forréttindapésum inni og gefur þeim andrými til að kokka upp eins lygilega aðferð og mögulegt er til að græða pening?

Svar: „Ofurdeild“ Evrópu í knattspyrnu.

Á sunnudagskvöld staðfesti tylft evrópskra knattspyrnufélaga sálarleysi sitt með því að tilkynna umheiminum að það væri ekki nóg fyrir þau að vera moldrík, þau vildu verða viðurstyggilega rík.

Félögin tólf hafa barist í bökkum frá því Covid-19 skaut fyrst upp kollinum - vilja þau meina allavega. Raunin er sú að félögin voru stórskuldug fyrir en vegna faraldursins „neyddist“ til að mynda eitt þeirra að segja upp 55 starfsmönnum. 

Nú horfir hins vegar til betri vegar þar sem eigendur liðanna hafa fundið leið til að græða fúlgur fjár sem mun reyndar bitna á um það bil öllum öðrum. Eitthvað sem þeim gæti ekki verið meira sama um.

Eigendurnir fylgjast með úr fílabeinsturni sínum og kippa sér lítið upp við að almúginn sé að tjúllast vegna atburðarásarinnar sem hrundið var af stað á sunnudagskvöld. Svo lengi sem almenningur er ekki með krumlurnar í kökunni þeirra þá er eigendunum sama um allt og alla. 

Kakan er þeirra, þeirra eigin og allir aðrir geta bara bakað sína eigin köku og haldið sitt eigið partý.

Tónlistarmaðurinn Bruce Springsteen hitti naglann á höfuðið árið 1978 þegar hann gaf út lagið Badlands, þar söng hann: 

„Poor man wanna be rich. Rich man wanna be king. And a king ain't satisfied 'til he rules everything.“

Var þetta ekki í fyrsta - og alls ekki síðasta - sem Stjórinn hitti naglann á höfiðið í textasmíð sinni. Þeir fátæku vilja vera ríkir, þeir ríku vilja konungar verða og konungar eru ekki sáttir fyrr en þeir stjórna einu og öllu.

Þarna liggur hundurinn grafinn þegar kemur að ofurdeild Evrópu. Eigendur liðanna telja sig vera afkomendur guðanna líkt og konungar forðum daga. Þar af leiðandi telja þeir það guðdómlegan rétt sinn að stýra öllu því sem gerist innan knattspyrnuheimsins.

Florentino Perez er formaður „ofurdeildar“ Evrópu.EPA-EFE/ANGEL DIAZ

Eigendurnir telja það ósanngjarnt að knattspyrnusamband Evrópu deili peningunum sem félög þeirra skapa með öðrum - lægra settum - félögum innan sambandsins. Lausnin er sú að stofnuð hefur verið guðleg deild þar sem aðeins félög með tengingu við guðina fá að leika listir sínar.

Sem betur fer. Ef horft er til úrslita helgarinnar þá gerðu lið guðanna til að mynda jafntefli við Getafe, Leeds United og Fulham á meðan eitt lá í valnum gegn Atalanta. Þau þurfa því að forðast fleiri leiki við lið almúgans þar sem guðleg ímynd þeirra gæti hrunið haldi úrslit sem þessi áfram að eiga sér stað.

Það virðist sem guðirnir átti sig einfaldlega ekki á því að ef fólkið hættir að trúa þá hætta þeir að vera til. Trúarbrögð sem og lífið sjálft eru ekkert án fólksins. Mögulega var fílabeinsturninn orðinn það hár að hinir guðlegu eigendur hafi einfaldlega ekki séð til jarðar lengur. 

Hvort turninn muni riða til falls eður ei í kjölfar frétta gærdagsins á eftir að koma í ljós. Það er hins vegar ljóst að fjöldinn allur af fólki er að grandskoða trúarlegar skoðanir sínar þessa dagana og mun ekki taka svo glatt á móti konungi sínum er hann loks stígur niður úr fílabeinsturninum, hvenær svo sem það má vera.


Tengdar fréttir

Liðin á bak­við ofur­deildina skuldug upp fyrir haus

Í gærkvöld birtu tólf knattspyrnufélög drög að stofnun svokallaðrar ofurdeildar Evrópu. Þótt ástæðan sé sögð vera jákvæð fyrir framþróun fótboltans í heild sinni er ljóst að liðin munu hagnast gríðarlega.

Frétta­skýring: Ofur­deild Evrópu

Ofurdeild þetta, ofurdeild hitt. Heitasta umræðuefni dagsins er eðlilega títtnefnd ofurdeild Evrópu í knattspyrnu. Hér að neðan verður kafað ofan í hvað felst í hugmyndinni, hvernig henni verður háttað og almennt allt sem henni viðkemur.




Fleiri fréttir

Sjá meira


×