Erlent

Fyrsta Súpermannsagan seldist á hundruð milljóna króna

Kjartan Kjartansson skrifar
Vincent Zurzolo, annar eigenda ComicConnect, fyrirtækisins sem bauð upp myndasöguna með blaðið verðmæta.
Vincent Zurzolo, annar eigenda ComicConnect, fyrirtækisins sem bauð upp myndasöguna með blaðið verðmæta. Vísir/AP

Ótilgreindur kaupandi festi kaup á eintaki af fyrsta tölublaði myndasögublaðsins Action Comics þar sem ofurhetjan Súpermann birtist í fyrsta sinn fyrir meira en fjögur hundruð milljónir íslenskra króna á uppboði. 

Fyrsta tölublað Action Comics kom út árið 1938 og kostaði þá tíu bandarísk sent. Í því var að finna sögu af uppruna Súpermann, síðasta syni plánetunnar Kryptons, sem er sendur til jarðarinnar þar sem hann öðlast ofurkrafta þökk sé geislum sólarinnar. Breska ríkisútvarpið BBC segir að talið sé að aðeins um hundrað eintök af blaðinu séu enn til.

Ekki var greint frá nafni kaupandans en hann er sagður tiltölulega nýr í fjárfestingum í ofurhetjusögum. Hann greiddi 3,25 milljónir dollara fyrir blaðið, jafnvirði tæpra 413 milljóna íslenskra króna. Seljandinn, sem átti eintakið aðeins í þrjú ár, hagnaðist um rúmar 127 milljónir íslenskra króna.

Með viðskiptunum á uppboðinu varð myndasögublaðið það verðmætasta sinnar tegundar í heiminum. Það er sagt hafa fundist í óaðfinnanlegu ástandi í bunka af myndasögum frá fjórða áratug síðustu aldar.

Bókmenntir Myndlist
Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið