Segja þörf á alþjóðlegum sáttmála um heimsfaraldra

Atli Ísleifsson skrifar 30. mars 2021 08:09

Emmanuel Macron Frakklandsforseti, Angela Merkel Þýskalandskanslari og Boris Johnson, forsætisráðherra Bretlands, eru í hópi þeirra sem standa að ákallinu. Myndin er frá NATO-fundi í desember 2019. EPA

Þörf er á alþjóðlegum sáttmála sem leggur línurnar fyrir það hvernig þjóðir heimsins taka á heimsfaraldri á borð við þann sem nú gengur yfir vegna Covid-19.

Þetta segja nokkrir af helstu leiðtogum heimsins í grein sem þau birta í blöðum víðsvegar um heim. Greinina undirrita meðal annarra Boris Johnson, forsætisráðherra Bretlands, Angela Merkel Þýskalandskanslari, Emmanuel Macron Frakklandsforseti og Erna Solberg, forsætisráðherra Noregs.

Leiðtogarnir lýsa kórónuveirufaraldrinum sem stærstu áskorun heimsbyggðarinnar síðan á fimmta áratug síðustu aldar þegar heimsstyrjöldin síðari var háð.

Að þeim hildarleik loknum hafi Sameinuðu þjóðirnar verið stofnaðar til að draga úr líkum á annarri heimstyrjöld og segja leiðtogarnir að nú sé aftur kominn tími til að efla samstöðu heimsbyggðarinnar allrar til að tryggja að hægt verði að bregðast við komandi farsóttum með áhrifaríkari hætti sem gagnist öllum þjóðum heims, stórum sem smáum.

„Enginn er öruggur fyrr en allir eru orðnir öruggir," segja leiðtogarnir.

Það eru 24 leiðtogar sem standa að baki ákallinu ásamt Tedros Adhanom Ghebreyesus, forstjóra Alþjóðaheilbrigðisstofnunarinnar, en greinarnar birtast meðal annars í breska blaðinu Telegraph, franska blaðinu Le Monde og þýska blaðinu Frankfurter Allgemeine Zeitung.

Faraldur kórónuveiru (COVID-19)

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.