Vill sjá unga leik­menn setja meiri pressu á „gamla skólann“ í lands­liðinu

Lítil sem engin endurnýjun hefur verið á íslenska landsliðinu í knattspyrnu frá árinu 2013 þegar Ísland mætti Króatíu í umspili fyrir heimsmeistaramótið.

„Tvær ástæður að mínu mati. Gamli skólinn er einfaldlega bara búinn að vera frekar góður öll þessi ár og búinn að gefa fá færi á sér að leyfa yngri kynslóðinni að taka við. Hin ástæðan er að mögulega er yngri kynslóðin ekki búin að vera nægilega sterk heldur til þess að setja pressu á gamla skólann,“ sagði Arnar um ástæðurnar bakvið lítilli endurnýjun í landsliðinu. Hann hélt svo áfram.

„Þeir eru búnir að fá fullt af leikjum, fullt af æfingaleikjum og örugglega búið að nota hundrað þúsund leikmenn öll þessi ár í landsliðinu og það vantar að þeir sem eru að koma inn á – og spila leiki – setji alvöru pressu á gömlu kallana til að verðskulda tækifærið.“

„Tek sem dæmi markmannsstöðuna, það hafa margir markmenn tekið stöðu Hannes [Þórs Halldórssonar] í vináttuleikjum en einhvern veginn heldur hann alltaf stöðu sinni því einhver er að gera mistök hingað og þangað. Nú er góð kynslóð að koma upp og vonandi er Albert [Guðmundsson] búinn að fá sína eldskírn og tilbúinn í slaginn enda gríðarlega hæfileikaríkur. Svo erum við með Ísak Bergmann [Jóhannesson] og fullt af strákum í U21 árs landsliðinu.“

„Það er ekkert óeðlilegt að í landsliði sem fer yfir 15 ára tímabil - þetta er ekki eins og í félagsliði þar sem þú getur skipt um á tveggja ára fresti – að það verði lítil endurnýjun. Það er ekki slæmt í sjálfu sér en ég kalla eftir meiri pressu frá yngri leikmönnum á þá eldri.“

Um miðvarðarstöðu íslenska landsliðsins

Hinn 27 ára gamli miðvörður á aðeins að baki 36 A-landsleiki þrátt fyrir að hafa leikið vel með PAOK í Grikklandi og þar áður Rostov í Rússlandi.

„Hann getur svo sannarlega gert tilkall í byrjunarlið og hefur getað gert það í langan tíma því hann er að spila í hörkudeildum og með góðum liðum. Það má ekki gleyma því að tengingin milli Kára [Árnasonar] og Ragnars [Sigurðssonar] hefur verið mikil undanfarið ár. Það er erfitt að slíta þessa tengingu. Þeir hafa alltaf staðið sig vel með landsliðinu og leggja sig alla fram.“

„Hornsteinninn í öllum góðum liðum er hryggjarsúlan, og tveir góðir miðverðir. Svo ég skil alveg þjálfarana að hrófla ekki of mikið við því en ég held samt að Sverrir fái núna mjög gott tækifæri til að tryggja sér þetta byrjunarliðssæti,“ sagði Arnar Gunnlaugsson að endingu.