Vara her­foringja­stjórnina við því að berja niður frið­söm mót­mæli með of­beldi

Sérstakur erindreki Sameinuðu þóðanna gagnvart Mjanmar, Christine Schraner Burgener mun hafa komið þeim skilaboðum til herforingjanna í símtali að ofbeldi gegn almennum borgurum muni hafa alvarlegar afleiðingar.

Herforingjarnir hafa hert tökin í landinu undanfarna daga eftir fjölmenn mótmæli sem komu í kjölfar valdaráns hersins þar sem helstu leiðtogar landsins voru fangelsaðir.

Táragasi og gúmmíkúlum hefur verið beitt og ein kona var skotin í höfuðið á dögunum. Þá hefur upplýsingaflæði verið takmarkað og slökkt var á internetinu um tíma þó sambandi hafi nú aftur verið komið á.

Í gær sagði talsmaður hersins einnig frá því að þeir sem mótmæli á götum úti eigi yfir höfði sér tuttugu ára fangelsi og háar fjársektir.

Þrátt fyrir þetta greinir Reuters fréttastofan frá því að í morgun hafi hópar komið saman, en mun fámennari en áður þó.