Guðjón keyrði mest þingmanna á síðasta ári

Vésteinn Örn Pétursson skrifar 16. janúar 2021 13:59

Guðjón ók mest allra þingmanna á síðasta ári. Vísir/Vilhelm

Guðjón S. Brjánsson, þingmaður Samfylkingarinnar í Norðvesturkjördæmi, var með mestan aksturkostnað allra þingmanna árið 2020.

Þetta kemur fram í umfjöllun Kjarnans. Þar segir að framlagður aksturskostnaður Guðjóns á síðasta ári nemi rúmum 2.699.000 krónum. Kostnaðurinn er allur til kominn vegna notkunar á bílaleigubifreiðum og eldsneytiskostnaðar, en ekki notkunar Guðjóns á eigin bifreið.

Í öðru sæti listans vegna kostnaðar við akstur þingmanna er Ásmundur Friðriksson, þingmaður Sjálfstæðisflokksins í Suðurkjördæmi. Akstur hans árið 2020 nam 2.218.000 krónum og dróst talsvert saman milli ára. Árið 2019 nam aksturskostnaður Ásmundar 3,8 milljónum. Ásmundur hefur verið efstur á listanum síðan tölur um aksturskostnað þingmanna var gerður opinber.

Þá er Bjarkey Olsen Gunnarsdóttir, þingmaður Vinstri grænna í Norðausturkjördæmi, í þriðja sæti listans. Hún ók fyrir 1.827.000 krónur á síðasta ári.

Ásmundur Friðriksson hefur, þangað til á síðasta ári, verið efstur á aksturlista þingmanna.vísir/vilhelm

Í umfjöllun Kjarnans er að finna lista yfir þá þingmenn sem óku fyrir meira en eina milljón króna á síðasta ári. Þingmennirnir eru ellefu en listann má sjá hér að neðan:

1. Guðjón S. Brjánsson, Samfylkingunni: 2.669.081 krónur

2. Ásmundur Friðriksson, Sjálfstæðisflokki: 2.217.867 krónur

3. Bjarkey Olsen Gunnarsdóttir, Vinstri græn: 1.827.141 krónur

4. Vilhjálmur Árnason, Sjálfstæðisflokki: 1.694.043 krónur

5. Birgir Þórarinsson, Miðflokki: 1.653.749 krónur

6. Sigurður Páll Jónsson, Miðflokki: 1.643.859 krónur

7. Haraldur Benediktsson, Sjálfstæðisflokki: 1.580.226 krónur

8. Lilja Rafney Magnúsdóttir, Vinstri grænum: 1.390.240 krónur

9. Halla Signý Kristjánsdóttir, Framsóknarflokki: 1.283.788 krónur

10. Albertína Friðbjört Elíasdóttir, Samfylkingunni: 1.124.066 krónur

11. Líneik Anna Sævarsdóttir, Framsóknarflokki: 1.069.035 krónur

Alþingi Aksturskostnaður þingmanna Samfylkingin

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.