Joe Biden flutti ávarp í gær frá heimaborg sinni, Wilmington í Delaware.Getty/Alex Wong
Joe Biden, verðandi Bandaríkjaforseti, kynnti í gærkvöldi aðgerðapakka sem ætlað er að örva bandarískan efnahag í kjölfar kórónuveirufaraldursins. Alls er fyrirhugað að verja 1.900 milljörðum Bandaríkjadala til ýmissa verkefna og meðal annars fá allir landsmenn 1.400 dala eingreiðslu, um 180 þúsund krónur.
Þá á að verja 415 milljörðum til að berjast við faraldurinn og 440 milljarðar fara til lítilla fyrirtækja, að því er fram kemur í frétt BBC.
Biden hefur sagst ætla að leggja höfuðáherslu á að sigrast á veirunni á fyrstu mánuðunum í embætti en hann tekur við næstkomandi miðvikudag, 20. janúar. Bandaríkjaþing þarf að samþykkja aðgerðapakkann, eigi hann að koma til framkvæmda.
Faraldurinn er í hæstu hæðum í Bandaríkjunum þar sem 385 þúsund manns hafa látist af völdum Covid-19.
Rúmlega 200 þúsund ný tilfelli greinast á hverjum degi og andlát af völdum sjúkdómsins eru um fjögur þúsund daglega.
Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.
