Múbarak í stofufangelsi á morgun

Hosní Múbarak, fyrrverandi forseta Egyptalands, verður að öllum líkindum sleppt úr haldi á morgun, eftir að hafa setið í varðhaldi frá því að honum var steypt af stóli fyrir rúmum tveimur árum. Hann mun þó dvelja í stofufangelsi þar sem hann á enn yfir höfði sér dóma vegna morða á mótmælendum í uppreisninni árið 2011.

Mál tengd Múbarak, sem sat á forsetastóli í 30 ár, hafa verið að velkjast í dómskerfinu í Egyptalandi síðustu ár. Í vikunni lét áfrýjunardómstóll niður falla ákærur um spillingu í starfi en forsetinn fyrrverandi á þó enn yfir höfði sér ákæru um að eiga sök á því að hundruð mótmælenda voru drepnir í uppreisninni gegn honum. 

Fregnir um lausn hans vöktu mikla úlfúð í landinu, sem rambar enn að margra mati á barmi borgarastyrjaldar. Talið er að ákvörðunin um að úrskurða Múbarak í stofufangelsi hafi verið tekin til að skvetta ekki olíu á þá elda.

Óvíst er hvar hann muni sitja í stofufangelsi; hvort það verði á heimili hans eða á sjúkrahúsi. Stuðningsmenn hins 85 ára Múbaraks segja hann vera afar heilsuveilan, en gagnrýnendur hafa sagt það yfirskin til að fá samúð og vægari meðferð.