Allt með kyrrum kjörum í Kaupmannahöfn

Svo virðist sem lögregla hafi náð algerri stjórn á ástandinu á Norðurbrú í Kaupmannahöfn þó einhverjir geri sig enn líklega til að vadla usla vegna niðurrifs Ungdomshuset. 17 voru handteknir í gær við mótmæli nærri húsinu. Þar voru um 100 mótmælendur saman komnir þegar mest var í gær.

Þá var mótmælt við fangelsi í Kaupmannahöfn þar sem tugir þeirra sem handteknir hafa verið í óeirðunum eru látnir dúsa. Mótmælendur í Kaupmannahöfn virðast eiga sér stuðningsmenn víða um heim því hávær mótmæli urðu við sendiráð Danmerkur í Osló í gærkvöldi, þar var táragasi beitt til að leysa upp 150 manna mótmæli.

Þá söfnuðust nokkrir tugir saman við sendiskrifstofu Dana í New York til að krefjast þess að þeir sem nú sitja í gæsluvarðhaldi verði látnir lausir. Vel gengur að rífa Ungdomshuset og gæti verkinu jafnvel lokið í dag.