Costa gæti verið á leið í fjögurra leikja bann

Diego Costa, framherji Englandsmeistara Chelsea, gæti fengið fjögurra leikja bann fyrir að sparka í Martin Skrtel, miðvörð Liverpool, í leik liðanna í gær.

Liverpool vann leikinn með þremur mörkum gegn einu en þetta var sjötta tap Chelsea í fyrstu 11 umferðunum.

Það myndi bæta gráu ofan á svart fyrir Chelsea ef Costa yrði dæmdur í bann en Mark Clattenburg, dómari leiksins, virtist ekki hafa séð atvikið og gerði a.m.k. ekkert í því.

Sjá einnig: Mourinho: Ég hef ekkert að segja

Verði Costa dæmdur sekur fer hann í fjögurra leikja bann þar sem hann hefur þegar verið í dæmdur í bann á tímabilinu, fyrir viðskipti sín við Gabriel, varnarmann Arsenal, í leik liðanna í september.

Verði Costa fundinn sekur missir hann af leikjum Chelsea gegn Stoke, Norwich, Tottenham og Bournemouth.