Annar karlmaður handtekinn vegna Savile-málsins

Annar karlmaðurinn hefur verið handtekinn í tengslum við rannsókn bresku lögreglunnar á því sem virðist vera umfangsmikil kynferðismisnotkun á unglingsstúlkum af hálfu sjónvarpsmannsins Jimmi Savile.

Karlmaður um sextugt var handtekinn í dag samkvæmt breskum fjölmiðlum en nafn hans hefur ekki verið gert opinbert. Tónlistarmaðurinn Gary Glitter hefur þegar verið færður til yfirheyrslu grunaður um aðild að málinu.

Hann neitar alfarið sök. Savile er látinn en grunur um kynferðisofbeldið vaknaði ekki fyrr en fyrir nokkrum vikum síðan.

Málið hefur dregið töluverðan dilk á eftir sér, enda hafa yfirmenn hjá breska ríkisútvarpinu, þar sem hann starfaði, verið sakaðir um aðgerðarleysi.