Fabregas vill verða fyrirliði Arsenal

Spænski miðjumaðurinn Cesc Fabregas hefur undirstrikað skuldbindingu sína við Arsenal með því að óska eftir því að fá að gerast fyrirliði liðsins í framtíðinni. Fabregas hefur nú lofað að einbeita sér að fullu að Arsenal eftir að hafa verið orðaður við Real Madrid í allt sumar.

"Allir leikmenn vilja taka á sig aukna ábyrgð hjá liði sínu og það á við mig líka. Ég hef haft augastað á því að vera fyrirliði allar götur síðan ég var strákur og það væri minnsta mál fyrir mig að gerast fyrirliði Arsenal," sagði hinn tvítugi Spánverji.