Slúðrið á Englandi í dag

Arjen Robben hjá Chelsea er eðlilega sá maður sem mest er talað um í slúðrinu á Englandi í dag, enda er talið að hann gangi í raðir Real Madrid á næstu dögum. The Sun segir að Real muni bjóða honum sex ára samning sem muni borga honum 24 milljónir punda í laun.

Daly Mail segir að Sunderland muni slá metið yfir dýrasta markvörðinn á Englandi með því að greiða Hearts 9 milljónir punda fyrir Craig Gordon. Daily Star segir að Freddie Ljungberg fari fram á 6 milljón punda bónusgreiðslu frá Arsenal áður en hann fer frá félaginu.

Obafemi Martins hjá Newcastle hefur neitað því að fara til Arsenal á 13 milljónir punda og vill vera áfram hjá norðanliðinu - Daily Express. Peter Kenyon, yfirmaður Chelsea, vill ekki selja Tottenham vængmanninn Shaun Wright-Phillips því hann óttast að Tottenham muni veita Chelsea samkeppni í baráttunni um enska meistaratitilinn á næstu leiktíð - The Sun.

Watford ætlar að bjóða Fulham 2 milljónir punda til að fá Heiðar Helguson aftur í sínar raðir - The Sun. Chelsea hefur áhuga á að fá til sín bakvörðinn Pascal Chimbonda frá Tottenham og er tilbúið að bjóða Glen Johnson í staðinn - Ýmsir. West Ham og Manchester City eru að berjast um að kaupa framherjann Roque Santa Cruz frá Bayern Munchen og sagt er að West Ham sé tilbúið að borga 5,5 milljónir punda fyrir hann - Daily Mail.

Middlesbrough og Manchester City eru að berjast um varnarmanninn Luke Young hjá Charlton og eru tilbúin að greiða 3 milljónir punda fyrir hann - Daily Mirror. Þá mun Charlton vera að íhuga að kaupa Danny Murphy aftur frá Tottenham - Mirror.