Aðeins einn íslenskur leikmaður í draumaliði Hermanns Hreiðarssonar

Fyrrum landsliðsmaðurinn Hermann Hreiðarsson lék með fjöldanum öllum af leikmönnum á sínum tíma. Aðeins einn íslenskur leikmaður kemst því í draumalið Hermanns.

Hermann Hreiðarsson var gestur Jóhanns Skúla Jónssonar í hlaðvarpinu Draumaliðið en fyrsti þáttur í fjórðu seríu fór í loftið í dag. Jóhann Skúli fær góða gesti til sín í þættinum og velja gestirnir bestu 11 leikmenn sem þeir spiluðu með á ferlinum ásamt því að deila skemmtilegum sögum. Eitthvað sem Hermann ætti að eiga nóg af.

Áður hafa til að mynda Guðmundur Benediktsson, Arnar Bergmann Gunnlaugsson, Ingólfur Þórarinsson (Ingó Veðurguð), Kristján Óli Sigurðsson, Brynjar Björn Gunnarsson, Hallbera Guðný Gísladóttir og margir fleiri mætt í stúdíó til Jóhanns og valið draumalið sitt.

Sjá einnig: Gummi Ben velur bestu samherjana á ferlinum

Hermann Hreiðarsson var atvinnumaður í Englandi í 15 ár. Lék hann með Crystal Palace, Brentford, Wimbledon, Ipswich Town, Charlton Athletic, Portsmouth og Coventry City. Þá lék hann með ÍBV hér heima ásamt því að þjálfa liðið eftir að hann lagði skóna á hilluna.

Í dag er Hermann aðstoðarmaður Sol Campbell hjá Southend United í ensku C-deildinni.

Hemmi, eins og hann er nær alltaf kallaður, lék einnig á sínum tíma 89 landsleiki fyrir Íslands hönd og skoraði í þeim fimm mörk. Það reka eflaust margir upp stór augu þegar þeir sjá að aðeins einn íslensku leikmaður kemst í draumalið hans, og það er ekki Eiður Smári Guðjohnsen.

Lið Hermanns litast mjög svo af veru hans í Portsmouth en það var líklega besti tími hans sem atvinnumanns. Með Harry Redknapp við stjórnvölin lenti liðið í 8. sæti tímabilið 2007 til 2008 og vann liðið enska FA bikarinn sama ár. Í kjölfarið var fagnað vel og innilega.

Alls eru sex leikmenn úr Portsmouth liðinu sem varð bikarmeistari í draumaliði Hermanns ásamt honum sjálfum en liðinu er stillt upp í 4-3-3 leikkerfi.

David James, sem Hermann sannfærði á einhvern ótrúlegan hátt um að spila með ÍBV sumarið 2014, er í markinu. 

Glen Johnson, fyrrum leikmaður Liverpool, er í hægri bakverðinum. Þá eru Sol Campbell, samstarfsmaður Hemma hjá Southend, og Sylvain Distin í hjarta varnarinnar á meðan Hemmi er í vinstri bakverði.

Á miðjunni er hinn öflugi Sulley Muntari og á vængnum er svo Niko Kranjcar, leikmaður sem Redknapp keypti þrisvar á ferlinum.

Aðrir leikmenn liðsins eru Jim Magilton, Matt Holland [báðir miðjumenn] á meðan Attilio Lombardi er á hinum vængnum og Heiðar Helguson leiðir línuna. 

Sá síðastnefndi er eini Íslendingurinn sem kemst í lið Hermanns. Athygli vekur að Eiður Smári er hvergi sjáanlegur en eflaust hefur Hermann nefnt góða og gilda ástæðu fyrir því.