Mögnuð endurkoma City dugði ekki til | Þrjú rauð á Anderlecht

Manchester City var einu marki frá því að næla í efsta sæti D-riðils Meistaradeildar Evrópu eftir 3-2 útisigur á Bayern München. Victoria Plzen nældi í Evrópudeildarsæti og rauð spjöld fóru á loft í Grikklandi.

Liðsmenn FC Bayern komust í 2-0 gegn Manchester City eftir aðeins tólf mínútur. Þá fór Micah Richards meiddur af velli og stefndi í leiðindakvöld enska liðsins í Þýskalandi. David Silva minnkaði hins vegar muninn af stuttu færi eftir vel útfærða sókn og möguleiki fyrir gestina.

Í síðari hálfleik gengu City-menn á lagið. Aleksandar Kolarov jafnaði metin úr vítaspyrnu og Englendingurinn James Milner, sem lagði upp markið fyrir Silva, skoraði sigurmarkið. City hefði tekið toppsætið af Bæjurum hefði þeim tekist að bæta við einu marki. Þýska liðið heldur toppsætinu á betri markatölu í innbyrðisviðureignum liðanna.

Olympiakos tryggði sér annað sætið í C-riðli með 3-1 sigri á Anderlecht. Javier Saviola skoraði tvö marka gríska liðsins. Hann klúðraði einnig vítaspyrnu í stöðunni 1-1 í upphafi síðari hálfleiks þegar Belgarnir misstu mann af velli með rautt spjald.

Saviola kom Olympiakos í 2-1 á 58. mínútu og Grikkirnir í góðum málum. Áður en yfir lauk fuku tveir til viðbótar útaf í liði Anderlecht auk þess sem Olympiakos bæði klúðraði og skoraði úr vítaspyrnu. Sigurinn tryggði liðinu annað sætið þrátt fyrir sigur Benfica á PSG í Portúgal.

Victoria Plzen tryggði sér sæti í 32-liða úrslitum Evrópudeildar með 2-1 sigri á CSKA Moskvu. Liðið fékk 3 stig í riðlinum líkt og Rússarnir en Tékkarnir skoruðu fleiri mörk á útivelli í innbyrðisviðureignum liðanna.

Staðan í riðlunum eftir leiki kvöldsins

A-riðill

Manchester United 1-0 Shaktar Donetsk

Real Sociedad 0-1 Bayer Leverkusen

United 14

Leverkusen 10

Donetsk 8

Sociedad 1

B-riðill

FC Kaupmannahöfn 0-2 Real Madrid

Fresta varð viðureign Galatasaray og Juventus vegna snjókomu.

Real 16

Juve 6

Galatasaray 4

FCK 4

C-riðill

Benfica 2-1 PSG

Olympiakos 3-1 Anderlecht

PSG 13

Olympiakos 10 (Olympiacos stendur betur innbyrðis)

Benfica 10

Anderlecht 1

D-riðill

Bayern München 2-3 Manchester City

Vikotira Plzen 2-1 CSKA Moskva

Bayern 15

Man City 15

Viktoria 3

CSKA 3