Færeyingar byrja að æfa í dag og ætla að spila leiki frá 9. maí

Færeyska fótboltatímabilið hefst eftir aðeins nítján daga en færeyska fótboltasambandið, Fótbóltsamband Føroya, tilkynnti þetta á heimasíðu sinni. Liðin í Betri deildinni eru því farin á fullt að undirbúa komandi tímabil.

Færeysku fótboltaliðin fengu að hefja aftur æfingar í dag 20. apríl en aðeins eitt COVID-19 tilfelli hefur fundist í Færeyjum frá 6. apríl. Einn greindist smitaður í fyrradag en þá hafði enginn mælst jákvæður í ellefu daga.

Fyrstu leikir tímabilsins í Betri deildinni fara síðan fram laugardaginn 9. maí en forráðamenn færeyska sambandsins tóku þessa ákvörðun í samráði við „Koronaráðgevingini“ sem er nefnd sem Færeyingar settu saman til að bregðast við útbreiðslu kórónuveirunnar í landinu.

Leikirnir í færeysku deildinni fara þó fram „uttan áskoðara” sem þýðir að engir áhorfendur verða leyfðir á leikjunum.

Fyrsta umferðin í Betri deildinni átti að fara fram 15. mars síðastliðinn og því átti að vera búið að spila sex umferðir. Fyrsta umferðin mun því fara fram á sama tíma og sú níunda átti að fara fram.

Í sömu yfirlýsingu kemur fram að reiknað er með að yngri flokkar fái að hefja æfingar 4. maí næstkomandi.