Innlent

Ísland undanþegið útflutningsbanni ESB á lækningavörum

Kjartan Kjartansson skrifar
Ursula von der Leyen, forseti framkvæmdastjórnar ESB, ræddi við Katrínu Jakobsdóttur, forsætisráðherra, í síma í dag. Framkvæmdastjórnin ákvað að undanskilja EFTA-ríkin útflutningsbanninu á fundi í kvöld.
Ursula von der Leyen, forseti framkvæmdastjórnar ESB, ræddi við Katrínu Jakobsdóttur, forsætisráðherra, í síma í dag. Framkvæmdastjórnin ákvað að undanskilja EFTA-ríkin útflutningsbanninu á fundi í kvöld. Vísir/Getty

Framkvæmdastjórn Evrópusambandsins samþykkti að leiðrétta reglugerð um útflutningsbann á lækningavörum þannig að það nái ekki til EFTA-ríkjanna innan evrópska efnahagssvæðisins, þar á meðal Íslands. Að óbreyttu hefði þurft sérstakt útflutningsleyfi til að flytja inn búnað sem er talinn nauðsynlegur í baráttunni gegn útbreiðslu kórónuveirufaraldursins til Íslands.

Í tilkynningu frá utanríkisráðuneytinu kemur fram að Evrópusambandið hafi fallist á sjónarmið Íslands og annarra EFTA-ríkja og fallið frá útflutningsbanni á tilteknum hlífðarbúnaði sem heilbrigðisstarfsfólk notar í störfum sínum.

Katrín Jakobsdóttir, forsætisráðherra, ræddi við Ursulu von der Leyen, forseta framkvæmdastjórnar ESB, í síma í dag þar sem von der Leyen hét því að beita sér fyrir lausn á málinu. Í yfirlýsingu forsætisráðuneytisins vegna símtalsins segir að þær hafi einnig rætt um lokun landamæra ríkja í Evrópu.

„Forsætisráðherra lagði áherslu á mikilvægi málsins og minnti á að ESB væri einn mikilvægasti samstarfsaðili Íslands. Undirstrikaði hún mikilvægi góðra samskipta og samstarfs EES-EFTA ríkjanna og Evrópusambandsins, ekki síst á þessum erfiðu tímum,“ segir í tilkynningunni.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.