Prófar Pep eitthvað nýtt þegar enska deildin fer aftur af stað?

Pep Guardiola, þjálfari enska knattspyrnufélagsins Manchester City, er duglegur við að prófa nýja hluti. Þar sem City hefur engu að tapa gæti hann tekið upp á einhverju sem við höfum ekki séð áður.

Þegar ensku úrvalsdeildinni var frestað þann 11. mars þá var Man City í 2. sæti deildarinnar með 57 stig, 25 stigum á eftir toppliði Liverpool. Þá er liðið 12 stigum á undan nágrönnum sínum Manchester United. Það ásamt því að liðið gæti verið á leið í bann frá Evrópukeppnum þá er ljóst að Pep hefur litlu sem engu að tapa.

Því hefur Michael Cox á The Athletic velt því upp hvort Pep muni brydda upp á nýjungum. Hann hefur nú þegar sýnt það að hann er ekki hræddur við breytingar. Hann færði Lionel Messi í stöðu framherja hjá Barcelona. Hann spilaði nánast 2-3-5 leikerfi með Bayern Munich á sínum tíma þar sem hann tók eftir því að þannig spilaði liðið nær alltaf þegar það var í sókn.

a) Fleiri utanáhlaup frá De Bruyne

Cox telur að Kevin De Bruyne, belgíski miðvallarleikmaður Man City, hafi verið einn besti leikmaður úrvalsdeildarinnar í vetur. Hann hefur spilað þó nokkrar stöður í leikkerfi Pep en Cox veltir því fyrir sér hvort við gætum séð De Bruyne meira út á væng að gefa fyrir.

City eiga leiki gegn Newcastle United og Burnley þegar deildin snýr aftur. Mögulega sjáum við De Bruyne í hlutverki hægri bakvarðar með Riyad Mahrez eða Bernardo Silva, báðir örvfættir, fyrir framan Belgann sparkvissa.

Í rauninni yrði De Bruyne meira í sókn heldur en vörn en City myndi að öllum líkindum vera með knöttinn í um það bil 80 prósent af tímanum sem leikurinn færi fram. Því gæti Pep leyft sér að prófa De Bruyne í þessu hlutverki.

b) Rodri í holunni

Þegar Pep var með Bayern þá tók hann til örþrifaráða í leik gegn Borussia Dortmund undir stjórn Jurgen Klopp. Pep ákvað að spila „hátt og langt.“ Hann setti Javi Martinez, sem líkt og Rodri, spialr venjulega sem djúpur miðjumaður eða miðvörður í holuna á bakvið fremsta mann liðsins.

Var það lausn Pep við gífurlegri pressu Dortmund á þeim tíma.

c) Enn meiri færsla á varnarmönnum liðsins

Pep er duglegur að færa varnarmenn sína til á meðan leik stendur og oftar en ekki eru miðjumenn í miðverði. Cox er ekki alveg viss hvað Pep gæti gert hér en við höfum séð hann skipa bakvörðum sínum að sitja á miðri miðjunni er liðið sækir frekar en að fara í utanáhlaup til að liðið sé betur í stakk búið til að verjast skyndisóknum.

d) Örvfættur vængmaður á vinstri vængnum

Leroy Sane, sem er meiddur sem stendur, var mikilvægur hlekkur í City liðinu sem vann titilinn tvö ár í röð. Hann hefur ekki verið mikið með á þessari leiktíð og því hefur Raheem Sterling, sem er réttfættur, verið mikið út á vinstri vængnum í 4-3-3 leikkerfi liðsins.

Mögulega sjáum við Bernardo, Mahrez eða hinn unga Phil Foden í hlutverki vinstri vængmanns þegar deildin snýr aftur.