Erlent

27 af 249 þingmönnum Repúblikana viðurkenna sigur Bidens

Kolbeinn Tumi Daðason skrifar
Trump og eiginkona hans Melania Trump halda frá Hvíta húsinu í dag en þau voru á leið til fundar með stuðningsmönnum Trump í Georgíuríki.
Trump og eiginkona hans Melania Trump halda frá Hvíta húsinu í dag en þau voru á leið til fundar með stuðningsmönnum Trump í Georgíuríki. Getty Images/Al Drago

Aðeins 27 þingmenn Repúblikana viðurkenna sigur Joes Biden í forsetakosningunum í Bandaríkjunni mánuði eftir sigur hans. Biden fékk sjö milljónum fleiri atkvæði á landsvísu en Donald Trump forseti og jafnmarga kjörmenn og tryggðu Trump sigur í kosningunum árið 2016. Biden hlaut 306 kjörmenn gegn 232 kjörmönnum Trump. Washington Post greinir frá þessu.

Tveir þingmenn Repúblikana telja Trump hafa borið sigur úr bítum í kosningunum þrátt fyrir engar sannanir þess efnis. 220 þingmenn úr fulltrúadeildinni og öldungadeildinni, um 88 prósent allra þingmanna flokksins, vilja ekki gefa upp afstöðu sína til úrslita kosninganna.

Washington Post gerði könnun meðal allra 249 þingmanna Repúblikana í kjölfar furðulegs þriggja stundarfjórðunga langs ávarp sem Trump birti á samfélagsmiðlum á miðvikudag. Trump endurtók framandlegar og stoðlausar ásakanir um stórfelld kosningasvik í forsetakosningunum. Hann hélt því meðal annars fram á fjarstæðukenndan hátt að hann hefði í raun „unnið auðveldlega“ í öllum ríkjum.

Lýsti ræðunni sem sinni mikilvægustu

Trump hefur neitað að viðurkenna ósigur og reynt að hnekkja úrslitunum í fjölda lykilríkja fyrir dómstólum. Hann og bandamenn hans hafa haldið fram stoðlausum ásökunum um að stórfelld kosningasvik hafi kostað hann sigurinn. Þeir hafa ekki lagt fram neinar trúverðugar sannanir fyrir þeim ásökunum.

Fráfarandi forsetinn hjó enn í sama knérunn í ávarpanu sérstæða á miðvikudag. Þar sást forsetinn í Hvíta húsinu þar sem hann tekur vanalega á móti erlendum erindrekum með bandaríska fánann og fána forsetaembættisins í bakgrunni láta höggin dynja á bandaríska kosningakerfinu og lýðræði með ósannindum, að sögn Washington Post. Lýsti Trump ræðunni sem mögulega þeirri mikilvægustu sem hann hefði nokkru sinni flutt.

„Úrslitum þessara kosninga var hagrætt. Allir vita það,“ sagði Trump ranglega.

Krefst aðgerða af hálfu Hæstaréttar

Hélt forsetinn því fram að „spillt öfl“ hefðu fyllt kjörkassa með fölsuðum atkvæðum. Svikin væru svo stórfelld að umfang þeirra væri fordæmalaust. 

Krafðist hann þess að Hæstiréttur Bandaríkjanna, þar sem hann hefur skipað þrjá af níu dómurum, „gerði það sem er rétt fyrir landið okkar“, það er að ógilda hundruð þúsunda atkvæða bandarískra kjósenda þannig að „Ég vinni auðveldlega í öllum ríkjum“.

Spurningarnar sem Washington Post spurði þingmennina, ýmist í símtali eða tölvupósti, voru þrjár. Hver vann kosningarnar? Styður þú eða mótmælir þú tilraunum Trump til að halda fram sigri? Ef Biden fær meirihluta í kjörmannaráðinu, munt þú viðurkenna hann sem löglega kjörinn forseta?

Langstærstur hluti þingmanna Repúblikana tóku ekki afstöðu til spurninga Washington Post.Washington Post

Aðeins brot af þingmönnum flokksins svöruðu fyrirspurnum Washington Post. Þrjátíu þeirra svöruðu síðustu spurningunni játandi, eða fimm fleiri en viðurkenna sigur Bidens í dag.


Tengdar fréttir

Segir Kína ætla að drottna yfir Bandaríkjunum og heiminum öllum

John Ratcliffe, æðsti yfirmaður leyniþjónusta Bandaríkjanna, segir að ráðamenn í Kína séu að undirbúa sig fyrir átök við Bandaríkin. Hann segir að Bandaríkjamenn og lýðræðið hafi ekki staðið frammi fyrir jafn mikilli ógn síðan í seinni heimsstyrjöldinni.

Skýrsla tekin af I­vönku Trump vegna fjár­mála­mis­ferlis­máls

Lögmenn frá dómsmálaráðherra Washington-borgar tóku skýrslu af Ivönku Trump, dóttur fráfarandi Bandaríkjaforseta og ráðgjafa hans, í tengslum við málsókn vegna meints misferlis með framlög til nefndar sem undirbjó innsetningarathöfn Trump árið 2017.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×