Erlent

Metfjöldi nýsmitaðra í Bandaríkjunum: „Fleiri próf jafngilda fleiri tilfellum“

Vésteinn Örn Pétursson skrifar
Frá kosningafundi Trumps í Wisconsin í kvöld. Eins og sjá má er fjöldi fólks viðstaddur og fjarlægðartakmörk spila ekki stórt hlutverk.
Frá kosningafundi Trumps í Wisconsin í kvöld. Eins og sjá má er fjöldi fólks viðstaddur og fjarlægðartakmörk spila ekki stórt hlutverk. Scott Olson/Getty

Aldrei hafa fleiri greinst með kórónuveiruna í Bandaríkjunum en í gær, fimmtudag. Alls greindust 91 þúsund manns og met nýsmitaðra voru slegin í fjölda ríkja. Á sama tíma létust yfir þúsund Bandaríkjamenn úr veirunni. Forseti Bandaríkjanna segir ástæðu þess að svo margir greinast vera fjölda prófa sem framkvæmd eru.

Yfir níu milljónir hafa greinst með kórónuveiruna í Bandaríkjunum, en það er meira en í nokkru öðru ríki heims. Í 21 ríki er faraldurinn í verulegri sókn.

Þeirra á meðal er Wisconsin, en spítalar í ríkinu hafa gefið út sameiginlega yfirlýsingu þar sem varað er við því að kosningafundur Donalds Trump Bandaríkjaforseta á föstudag muni gera illt verra og ýta undir útbreiðslu á svæðinu.

„Það er mikilvægara en nokkru sinni fyrr að koma í veg fyrir myndun stórra hópa, sérstaklega hér í Green Bay í Wisconsin, þar sem nú er einhver mesta dreifing Covid-19 í öllum Bandaríkjunum,“ segir í yfirlýsingunni, sem var send út sameiginlega frá nokkrum spítölum í ríkinu.

Trump heldur sig þó við það sem hann hefur áður sagt, um að ástæða fjölda þeirra sem greinst hafa í Bandaríkjunum, sé að Bandaríkin prófi meira fyrir veirunni en önnur ríki.

„Fleiri próf jafngilda fleiri tilfellum. Við erum með bestu prófanirnar. Dauðsföllum FÆKKAR VERULEGA,“ tísti Trump í dag og bætti við að spítalar hefðu mikið svigrúm til að bæta við sig sjúklingum og að staðan í Bandaríkjunum væri betri en í Evrópu.

Kosningafundir forsetans, í aðdraganda forsetakosninga í Bandaríkjunum næsta þriðjudag, hafa verið gagnrýndar sökum þess hve sóttvörnum er ábótavant á slíkum viðburðum. Gestir hafa verið prófaðir og látnir hafa grímur, en fjarlægðartakmörkum er gefinn lítill gaumur. Þá virðist stór hluti þeirra sem sækir fundina sleppa því að bera grímu.

Helsti andstæðingur forsetans í kosningunum, fyrrverandi varaforsetinn og demókratinn Joe Biden, hefur einnig haldið kosningafundi. Þar hefur fjarlægðartakmörkunum verið fylgt, meðal annars með því að biðja fólk að vera inni í bílum sínum meðan á fundunum stendur.

Segjast hafa stjórn á faraldrinum

Donald Trump yngri, elsti sonur forsetans, fór í viðtal hjá sjónvarpsstöðinni Fox News í gær þar sem hann endurtók fullyrðingar föður síns um að ríkisstjórn hans hefði náð stjórn á faraldrinum.

„Ég fór í gegn um tölurnar því ég var alltaf að heyra um fjölgun smitaðra,“ sagði Trump yngri, og átti þar við tölur frá Sóttvarnastofnun Bandaríkjanna.

„Ég hugsaði „Af hverju er enginn að tala um dauðsföll?“ Af því tölurnar eru nánast engar. Af því við höfum náð stjórn á þessu og vitum hvernig þetta virkar,“ sagði Trump yngri og átti þar við að dauðsföll af völdum Covid-19 væru á undanhaldi.

Eins og áður sagði létust yfir þúsund Bandaríkjamenn úr Covid-19 í gær. Var það þriðji dagurinn í októbermánuði þar sem dagleg tala látinna vegna sjúkdómsins náði yfir þúsund. Meira en 228.000 Bandaríkjamenn hafa látið lífið af völdum sjúkdómsins frá upphafi faraldursins.

Bandaríkin stefni „í ranga átt“

Læknar og aðrir heilbrigðissérfræðingar hafa varað við því að faraldurinn sé langt frá því að vera í rénun í Bandaríkjunum. Dauðsföllum muni fjölga í takt við fjölgun smitaðra, og þá sérstaklega samhliða árlegri inflúensu.

Einn helsti sóttvarnasérfræðingur Bandaríkjanna, Dr. Anthony Fauci, sagði í viðtali við CNBC á miðvikudag að Bandaríkin stefndu í „ranga átt“, með tilliti til viðbragða við faraldrinum. 

„Ef hlutirnir fara ekki að breytast og þeir halda áfram á þeirri braut sem við erum á, verður mikill sársauki hér í tengslum við fjölgun smitaðra, spítalainnlagna og dauðsfalla,“ sagði Fauci meðal annars.


Tengdar fréttir

Trump gerði grín að grímunotkun

Keppinautarnir í forsetakosningunum í Bandaríkjunum reyna hvað þeir geta til að ná hylli kjósenda nú þegar þeir eru á síðustu metrunum aðeins nokkrum dögum fyrir kjördag sem er næstkomandi þriðjudag.

„Við munum ekki ná stjórn á faraldrinum“

Það má segja að starfsmannastjóri Hvíta hússins, Mark Meadows, hafi verið óvenju hreinskilinn í viðtali við CNN í gær um áætlanir bandarískra yfirvalda í tengslum við kórónuveirufaraldurinn.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.