Fótbolti

Fröken áreiðanleg jafnaði metið | Einu sinni meidd og einu sinni með flensu

Sindri Sverrisson skrifar
Sara Björk Gunnarsdóttir jafnaði landsleikjametið þegar hún mætti Svíþjóð í gær, og átti stórleik.
Sara Björk Gunnarsdóttir jafnaði landsleikjametið þegar hún mætti Svíþjóð í gær, og átti stórleik. VÍSIR/VILHELM

Sara Björk Gunnarsdóttir, landsliðsfyrirliði í fótbolta, hefur aðeins misst af tveimur mótsleikjum með íslenska landsliðinu frá því að hún kom 16 ára gömul inn í liðið í ágúst 2007.

Sara jafnaði leikjamet Katrínar Jónsdóttur og lék frábærlega sinn 133. A-landsleik í 1-1 jafnteflinu við Svíþjóð í gær. Þó er Sara enn aðeins 29 ára gömul en hún fagnar þrítugsafmælinu næsta þriðjudag.

Klippa: Umræða um Söru Björk og metið

Sara er annáluð fyrir samviskusemi, hörku og dugnað, ekki bara í leikjum heldur á æfingum, og það er engin tilviljun að hún hefur varla misst af leik á sínum landsliðsferli. Jón Þór Hauksson landsliðsþjálfari lofaði Söru í hástert eftir stórleik hennar í gær og benti á að hún hefði svo sannarlega átt skilið að fá markið sem hún skoraði dæmt gilt.

Lék 32 landsleiki í röð

Það var raunar ekki fyrr en sumarið 2018, eftir ellefu ár í landsliðinu, sem Sara missti í fyrsta sinn af mótsleik (leik í undan- eða lokakeppni stórmóts) vegna meiðsla. Það var leikur við Slóveníu í undankeppni HM, en Sara hafði þá farið meidd af velli í úrslitaleik Meistaradeildar Evrópu.

Hinn mótsleikurinn sem Sara hefur misst af með landsliðinu var gegn Frökkum í október 2009, en þá hafði hún fengið svínaflensuna.

Sara hefur ekki misst af einum einasta A-landsleik vegna leikbanns.

Sara Björk kom inn í A-landsliðið áður en hún mátti fá bílpróf og hefur nú leikið 133 leiki fyrir liðið.VÍSIR/VILHELM

Auk mótsleikjanna tveggja hefur Sara svo ekki tekið þátt í 11 leikjum til viðbótar, frá því að hún steig sín fyrstu skref með landsliðinu. Leikina 13 má sjá hér að neðan. Hún náði mest að spila 32 landsleiki í röð á árunum 2013-2015, og náði að leika 87 af fyrstu 92 landsleikjunum sem voru í boði eftir að hún hóf landsliðsferilinn.

Landsleikir án Söru frá árinu 2007

  • 7.3.2020 Pinatar Cup Ísland - Skotland 0 - 1
  • 9.4.2019 Vináttulandsleikur Suður Kórea - Ísland 1 - 1
  • 6.4.2019 Vináttulandsleikur Suður Kórea - Ísland 2 - 3
  • 6.3.2019 Algarve-bikarinn Portúgal - Ísland 1 - 4
  • 11.6.2018 Undankeppni HM Ísland - Slóvenía 2 - 0
  • 23.1.2018 Vináttulandsleikur Noregur - Ísland 2 - 1
  • 24.10.2016 Sincere Cup Úsbekistan - Ísland 0 - 1
  • 14.2.2016 Vináttulandsleikur Pólland - Ísland 1 - 1
  • 8.3.2013 Algarve-bikarinn Ísland - Svíþjóð 1 - 6
  • 7.3.2012 Algarve-bikarinn Ísland - Danmörk 1 - 3
  • 24.10.2009 Undankeppni HM Frakkland - Ísland 2 - 0
  • 11.3.2009 Algarve-bikarinn Kína - Ísland 2 - 1
  • 9.3.2009 Algarve-bikarinn Ísland - Danmörk 0 - 2

Ef ekkert kemur upp á mun Sara bæta landsleikjametið þegar Ísland mætir Svíþjóð á nýjan leik í Gautaborg 27. október.

Þó að Sara hafi varla misst af leik með landsliðinu, og byrjað landsliðsferilinn 16 ára, kemur hún ekki til með að geta bætt heimsmet hinnar bandarísku Kristine Lilly sem lék 354 A-landsleiki á sínum ferli. Bandaríska landsliðið hefur í gegnum árin spilað mun fleiri leiki en það íslenska.


Tengdar fréttir




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.