Öskraði úr sér lungun þegar Svíar gátu fengið mark á silfurfati | Sara átti sannarlega skilið mark

Jón Þór Hauksson fór yfir tilfinningarússíbanann í lok fyrri hálfleiks á Laugardalsvelli í kvöld, þegar mark var dæmt af Söru Björk Gunnarsdóttur. Mark sem Sara átti svo innilega skilið að skora að mati landsliðsþjálfarans.

Jón Þór jós Söru lofi þegar Vísir spurði hann út í markið sem hún skoraði, en króatískur dómari taldi Glódísi Perlu Viggósdóttur hafa brotið á markmanni Svía og dæmdi markið af, ranglega að mati þjálfarans.

„Sara hefur verið frábær í þessu verkefni, frábær leiðtogi, og hefði svo sannarlega átt skilið að skora í kvöld. Hún er að koma úr rússíbana sjálf, ekki langt síðan hún vann Meistaradeildina og var valin besti miðjumaður Meistaradeildarinnar, sem er stórkostlegur árangur. Það er mjög krefjandi verkefni að koma hingað heim fyrir hana, eftir þetta ótrúlega sumar og árangur. Það er því partur af svekkelsinu yfir því að markið skyldi dæmt af, því hún átti svo sannarlega skilið að skora,“ sagði Jón Þór.

„Sem betur fer voru engir áhorfendur“

Eftir að Sara skoraði hópaðist allt íslenska liðið, fyrir utan Söndru Sigurðardóttur markmann, saman í vítateig Svía til að fagna. Engin virtist heyra að dómarinn hefði flautað svo Svíar ætluðu að taka aukaspyrnuna sem dæmd var og geysast fram auðan völlinn til að skora. Dómarinn stöðvaði það þó, einhverra hluta vegna. Atvikið má sjá hér að neðan.

„Dómarinn dæmir leikinn og ef þær hefðu skorað þarna þá væri það bara partur af leiknum,“ sagði Jón Þór en íslensku þjálfararnir reyndu hvað þeir gátu að gera leikmönnum grein fyrir því hvað væri að gerast:

„Við vorum ekkert allt of uppteknir á bekknum af því hvort þetta væri réttur eða rangur dómur þegar þetta gerðist. Þegar maður áttaði sig á því að hún væri að dæma markið af öskraði maður úr sér lungun. Sem betur fer voru engir áhorfendur og ég veit svo sem ekki hvað þær heyrðu, en við reyndum að öskra á þær að fara til baka.

Við hefðum vel getað fengið á okkur mark þarna, en þær áttu samt eftir að fara framhjá Söndru og gerðu það bara einu sinni í dag. Hún varði frábærlega í þessum leik svo það er ekki víst að þær hefðu skorað, en þær hefðu vissulega komist í góða stöðu,“ sagði Jón Þór.