Landsliðsþjálfari Svíþjóðar, Peter Gerhardsson, segir leitt að geta ekki skoðað sig um í Reykjavík vegna kórónuveirufaraldursins. Hann segir sænska liðið bera virðingu fyrir því íslenska fyrir toppslaginn í kvöld.
Ísland og Svíþjóð mætast á Laugardalsvelli kl. 18 í toppslag E-riðils undankeppni EM, í beinni útsendingu á Stöð 2 Sport. Sænska liðið vann Ungverja 8-0 á fimmtudaginn, bronsverðlaun á HM í Frakklandi í fyrra og silfurverðlaun á síðustu Ólympíuleikum, og er í fimmta sæti heimslistans.
„Við áttum nánast fullkomið mót í Frakklandi,“ sagði Gerhardsson við Vísi í gær eftir æfingu sænska liðsins, þar sem allir leikmenn tóku þátt.
Berum virðingu fyrir íslenska liðinu
Ísland vann Lettland 9-0 síðasta fimmtudag og er eina liðið sem berst við Svíþjóð um efsta sæti riðilsins:
„Við höfum auðvitað horft á leiki Íslendinga og erum með okkar áætlun um hvernig við truflum þeirra leik. Íslenska liðið er gott. Ég sá það spila á EM 2017 og það spilar svolítið eins og við – sýnir hörku og áræðni í varnarleiknum, vill vinna boltann, og er með nokkra mjög hæfileikaríka leikmenn til að spila boltanum.
Sara Björk Gunnarsdóttir spilar með Lyon og það segir sína sögu um hana, og Glódís Perla Viggósdóttir spilar í sænsku úrvalsdeildinni þar sem hún er ein sú besta. Við berum virðingu fyrir þessum leikmönnum og þessu liði, en teljum líka að við getum náð góðum úrslitum,“ sagði Gerhardsson.
Leitt að geta ekki gengið um í Reykjavík eins og síðast
Föst leikatriði nýttust sænska liðinu einstaklega vel gegn Ungverjum í síðustu viku en Gerhardsson býst ekki við neinu slíku í kvöld:
„Ég hef sem þjálfari aldrei séð liðið mitt skora sex mörk úr föstum leikatriðum í sama leiknum. Íslenska liðið er gott í föstum leikatriðum eins og við, bæði í vörn og sókn, svo að það væri mjög ásættanlegt að ná inn einu marki þannig og gæti fært okkur sigurinn,“ sagði þjálfarinn.
Sænski hópurinn er lokaður inni á hóteli í Reykjavík þann tíma sem hann dvelur hér á landi, fyrir utan að mega fara á Laugardalsvöll til æfinga og keppni, vegna Covid-reglna.
„Ég hef komið hingað einu sinni áður, þegar ég var í fyrsta sinn með U16-landslið karla [snemma á þessari öld]. Þegar ég kem til borga langar mig auðvitað að geta gengið, áður hlaupið, og skoðað mig um. Það er því auðvitað leitt að vera fastur uppi á hóteli, en við erum vön að vera mjög mikið uppi á hóteli. Maður þarf að finna leiðir til að drepa tímann en það fer mikill tími í að skoða komandi leik og fara yfir leikaðferðina með leikmönnum. Ég hugsa því ekki svo mikið um þetta en auðvitað er pínu leitt að geta ekki skoðað Reykjavík,“ sagði Gerhardsson.
