Klopp skammaði varamennina fyrir að fagna rauða spjaldinu sem Christiansen fékk

Ingvi Þór Sæmundsson skrifar 21. september 2020 07:30

Jürgen Klopp var ekki sáttur með varamenn Liverpool þegar þeir glöddust yfir rauða spjaldinu sem Andreas Christiansen fékk. getty/Andrew Powell

Jürgen Klopp skammaði varamenn Liverpool þegar þeir fögnuðu rauða spjaldinu sem Andreas Christiansen, varnarmaður Chelsea, fékk í leik liðanna í ensku úrvalsdeildinni í gær. Liverpool vann leikinn, 0-2.

Undir lok fyrri hálfleiks braut Christiansen á Sadio Mané sem var að sleppa í gegnum vörn Chelsea. Paul Tierney gaf Christiansen fyrst gula spjaldið en eftir að hafa skoðað atvikið á sjónvarpsskjá breytti hann dómnum og rak Danann af velli.

Varamenn Liverpool sem sátu uppi í stúku á Stamford Bridge kættust mjög þegar Christiansen fékk rauða spjaldið og fögnuðu því. Það var Klopp ekki sáttur með, skammaði þá og sagði að svona gerðu menn aldrei.

Mané tryggði Liverpool sigur með tveimur mörkum í upphafi seinni hálfleiks. Það fyrra kom eftir frábæra sókn Englandsmeistaranna en það síðara eftir skelfileg mistök Kepa Arrizabalaga í marki Chelsea.

Liverpool hefur unnið báða leiki sína í ensku úrvalsdeildinni á tímabilinu. Næsti deildarleikur liðsins er gegn Arsenal á Emirates eftir viku.

Enski boltinn

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.