Barcelona losaði sig við Ronaldo

Brasilíski knattspyrnumaðurinn Ronaldo er að margra mati einn hæfileikaríkasti knattspyrnumaður sögunnar og fékk tvisvar sinnum Gullboltann sem sá besti í heimi.

Það vita færri kannski af því að Barcelona losaði sig við hann þegar hann var á leiðinni að fá Gullboltann í fyrsta sinn og hafði skömmu áður verið kosinn besti knattspyrnumaður heims hjá FIFA aðeins tvítugur.  

Ronaldo kom til Barcelona frá PSV Eindhoven fyrir 1996-97 tímabilið og skoraði 47 mörk í 49 leikjum á sínu fyrsta tímabili. Þrátt fyrir þessa mögnuðu frammistöðu í búningi Barca leyfði félagið honum að fara. Ronaldo var þarna orðinn sá besti í heimi og var ekki orðinn 21 árs gamall.

Nú hefur Ronaldo sagt frá því að hann vildi spila áfram með Barcelona þegar hann var seldur til Ítalíu vegna þess að spænska félagið náði ekki að ganga frá nýjum samningi við hann.

Barca let Ronaldo go pic.twitter.com/qjpzrEhxMC

— B/R Football (@brfootball) February 12, 2020

„Ég var búin að skrifa undir nýjan samning við Barcelona í lok tímabilsins og svo fór ég í verkefni með brasilíska landsliðinu. Fimm dögum síðar þá hringdu þeir í mig og sögðu að þeir gætu ekki skrifað undir þennan samning. Þetta var því aldrei í mínum höndum því ég vildi vera áfram hjá Barcelona,“ sagði Ronaldo í nýju viðtali um félagsskiptin frá Barcelona til Internazionale.

Internazionale keypti hann á 27 milljónir punda og gerði hann að dýrasta leikmanni heims.

Ronaldo var hjá Inter til 2002 þegar hann fór til Real Madrid. Ronaldo byrjaði mjög vel hjá ítalska félaginu og skoraði 34 mörk í 47 leikjum á fyrsta tímabilinu en restina af tíma sínum þar var hann mjög óheppinn með meiðsli.   

Ronaldo var hins vegar öflugur hjá Real Marid og skoraði 104 mörk í 177 leikjum á fimm tímabilum sínum með liðinu. Hann spilaði síðan fyrir A.C. Milan og brasilíska félagið Corinthians áður en skórnir fóru upp á hillu árið 2011.