Úlfarnir upp fyrir Man. Utd og Everton

Sindri Sverrisson skrifar
Conor Coady var ósáttur við að mark Úlfanna fengi ekki að standa.
Conor Coady var ósáttur við að mark Úlfanna fengi ekki að standa. vísir/epa

Wolves og Leicester gerðu markalaust jafntefli á Molineux, heimavelli Úlfanna, í ensku úrvalsdeildinni í fótbolta í kvöld.

Úlfarnir virtust hafa náð forystunni undir lok fyrri hálfleiks eftir vel útfærða hornspyrnu og skallamark Willy Boly. Markið var hins vegar dæmt af vegna klaufalegrar rangstöðu í aðdragandanum.

Úlfarnir voru manni fleiri frá 76. mínútu eftir að Hamza Choudhury fékk sitt annað gula spjald og þar með rautt, en ekkert mark var skorað.

Þrátt fyrir það komust Úlfarnir upp fyrir Manchester United og Everton, í 7. sæti með 36 stig. United á leik til góða. Úlfarnir eru þremur stigum á eftir Sheffield United sem er í 5. sæti, en í ljósi frétta kvöldsins af Manchester City gæti það sæti gefið þátttökurétt í Meistaradeild Evrópu á næstu leiktíð.

Leicester er áfram í 3. sæti, stigi á eftir Manchester City sem á leik til góða.

Bein lýsing

Leikirnir




    Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.
    Velkomin á Vísi. Þessi vefur notar vafrakökur. Sjá nánar.