María og Englandsmeistararnir fengu bikarinn í dag

María Þórisdóttir og stöllur hennar hjá Chelsea veittu Englandsmeistarabikarnum viðtöku í dag.

Englandsmeistararnir fengu bikarinn og gullmedalíurnar sínar afhentar við nokkuð látlausa athöfn á æfingasvæðinu í dag.

Chelsea var krýnt Englandsmeistari 5. júní, sama dag og María fagnaði 27 ára afmæli sínu. Í vikunni á undan var ákveðið að blása tímabilið af vegna kórónuveirufaraldursins. 

Þegar útkoma tímabilsins var ákveðin var farið eftir stigum að meðaltali í leik. Chelsea var einu stigi á eftir Manchester City þegar keppni var hætt en með fleiri stig að meðaltali í leik.

Þetta er annar meistaratitill Maríu með Chelsea. Hún varð einnig Englandsmeistari með Lundúnaliðinu fyrir tveimur árum. Norska landsliðskonan kom til Chelsea frá Klepp 2017.

Chelsea hefur þrisvar sinnum orðið enskur meistari (2015, 2018 og 2020), í öll skiptin undir stjórn Emmu Hayes.