Chelsea vann síðasta bikarúrslitaleikinn sem var ekki í maí

Chelsea og Arsenal mætast í úrslitaleik ensku bikarkeppninnar á morgun, 1. ágúst. Leikið verður fyrir luktum dyrum á Wembley.

Vanalega fer bikarúrslitaleikurinn fram í maí en þetta tímabil er ólíkt öllum öðrum vegna kórónuveirufaraldursins.

Fimmtíu ár eru síðan bikarúrslitaleikurinn fór ekki fram í maí. Og þá varð Chelsea bikarmeistari.

Þann 11. apríl 1970 mættust Chelsea og Leeds United í bikarúrslitaleiknum á gamla Wembley. Staðan var 2-2 eftir venjulegan leiktíma og framlengingu. Ekki var farið í vítaspyrnukeppni eins og núna og liðin þurftu að mætast aftur.

Wembley var í svo slæmu ásigkomulagi eftir bikarúrslitaleikinn að ákveðið var að endurtekni leikurinn færi fram á Old Trafford, þann 29. apríl 1970. Þetta var eini bikarúrslitaleikurinn frá 1923 til 2000 sem fór ekki fram á Wembley.

Líkt og fyrri leikurinn fór sá seinni í framlengingu. Staðan var 1-1 eftir venjulegan leiktíma. Á 104. mínútu skoraði miðvörðurinn David Webb sigurmark Chelsea og tryggði liðinu sinn fyrsta bikarmeistaratitil.

Seinni bikarúrslitaleikurinn 1970 er frægur, eða öllu heldur alræmdur fyrir hversu grófur hann var. Árið 1997 sagði David Elleray að hann hefði gefið sex rauð spjöld í leiknum. Í ár sagði Michael Oliver að hann hefði gefið ellefu rauð spjöld. Dómari leiksins á Old Trafford, Eric Jennings, lyfti gula spjaldinu aðeins einu sinni.

Chelsea hefur alls átta sinnum orðið bikarmeistari en Arsenal þrettán sinnum, oftast allra liða. Hvernig sem fer er ljóst að það verður knattspyrnustjóri sigurvegaranna vinnur sinn fyrsta titil á ferlinum. Frank Lampard tók við Chelsea fyrir tímabilið og Mikel Arteta var ráðinn stjóri Arsenal í desember á síðasta ári.

Bikarúrslitaleikur Arsenal og Chelsea hefst klukkan 16:30 á morgun og verður sýndur beint á Stöð 2 Sport 2.