Erlent

Trump ýjar að því að kosningum verði frestað

Kjartan Kjartansson skrifar
Kannanir benda til þess að Trump biði ósigur í kosningum í haust. Nú talar hann um að fresta kosningunum.
Kannanir benda til þess að Trump biði ósigur í kosningum í haust. Nú talar hann um að fresta kosningunum. EPA/Stefani Reynolds

Donald Trump Bandaríkjaforseti ýjaði að því að forsetakosningunum sem eiga að fara fram í nóvember verði mögulega frestað þó að hann hafi ekki völd til þess. Í tísti sem forsetinn sendi frá sér í dag heldur hann því rakalaust fram að stórfelld svik verði framin í kosningunum.

Póstatkvæði sem yfirvöld í ýmsum ríkjum Bandaríkjanna vilja auðvelda fleiri kjósendum að nýta í forsetakosningunum til að draga úr smithættu vegna kórónuveirufaraldursins hefur lengi verið Trump þyrnir í augum. Forsetinn hefur haldið fram án sannana að póstatkvæðum muni fylgja stórfelld kosningasvik.

Í tísti sínu í dag heggur Trump í sama knérunn og segir að forsetakosningarnar verði þær „ÓNÁKVÆMUSTU og SVIKSAMLEGUSTU“ í sögunni með póstatkvæðum fyrir alla. Þær eigi eftir að verða þjóðarskömm fyrir Bandaríkin.

„Fresta kosningunum þar til fólk getur kosið almenninglega, öruggt og hættulaust???“ tísti Bandaríkjaforseti.

Trump hefur átt verulega undir högg að sækja í skoðanakönnunum undanfarið. Slæleg viðbrögð hans við kórónuveirufaraldrinum og mótmælum vegna lögregluofbeldis og kerfislægrar kynþáttahyggju hafa komið verulega niður á vinsældum hans. Mælist Joe Biden, væntanlegt forsetaefni Demókrataflokksins, með allt að tíu prósentustiga forskot á Trump í sumum könnunum á landsvísu.

Biden hefur ítrekað varað við því að Trump gæti átt eftir að reyna að „stela“ kosningunum eða vefengja úrslitin og neita að víkja.

Tíst Trump komu um stundarfjórðungi eftir að greint var frá því að hagkerfi Bandaríkjanna hefði dregist saman um 9,5% á öðru ársfjórðungi. Það er mesti samdráttur á einum ársfjórðungi frá því að byrjað var að taka saman slíkar hagtölur fyrir um sjötíu árum, að sögn Washington Post.

Fordæmalaust er að forsetakosningum sé frestað í Bandaríkjunum. Þannig var forsetakosningum hvorki frestað í bandaríska borgarastríðinu né í síðari heimsstyrjöldinni.

AP-fréttastofan segir að kveðið sé á um kjördag forsetakosninga, fyrsta þriðjudag eftir fyrsta mánudag í nóvember, í alríkislögum. Honum verði ekki breytt nema með lagabreytingu á Bandaríkjaþingi. Þá geri stjórnarskrá ekki ráð fyrir neinum töfum á innsetningu nýs forseta sem á að fara fram 20. janúar árið 2021.

Engar vísbendingar eru um að víðtæk kosningasvik fylgi póstatkvæðum þrátt fyrir fullyrðingar Trump forseta og sumra repúblikana. Í fimm ríkjum er aðeins kosið með póstatkvæðum og segjast þau hafa nauðsynlegar öryggisráðstafanir til að tryggja að erlendir aðilar spilli kosningunum ekki. Kosningasérfræðingar segja að kosningasvindl sé almennt fátítt í Bandaríkjunum.

Trump hefur engu að síður ítrekað hamrað á því að kosningarnar í haust verði á einhvern hátt „spilltar“ eða „sviksamlegar“. Utankjörfundaratkvæði eins og póstatkvæði séu helsta ógnin við endurkjör hans. Repúblikanaflokkurinn og forsetaframboð Trump hafa höfðað mál til þess að stöðva áform ríkja um að gera fleirum kleift að greiða atkvæði með pósti eða utankjörfundar.


Tengdar fréttir

Á brattann að sækja hundrað daga í kosningar

undrað dagar eru þar til Bandaríkjamenn ganga til kosninga og velja sér forseta til fjögurra ára. Donald Trump sækist eftir endurkjöri en hann á þó á brattann að sækja.

Trump skiptir um kosningastjóra í skugga dvínandi vinsælda

Donald Trump Bandaríkjaforseti tilkynnti í gær að hann ætlaði að skipta um kosningastjóra. Forsetinn hefur átt undir högg að sækja í skoðanakönnunum og er sagður kenna fráfarandi kosningastjóranum um misheppnaðan kosningafund í Tulsa á dögunum.

Biden með afgerandi forskot í skoðanakönnunum

Skoðanakannanir benda til þess að Joe Biden, líklegur forsetaframbjóðandi demókrata, hefði afgerandi sigur á Donald Trump Bandaríkjaforseta í kosningum sem fara fram í nóvember.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.