Erlent

Dular­fullur fíla­dauði í Botsvana

Atli Ísleifsson skrifar
Hin dularfullu dauðsföll hafa átt sér stað frá í byrjun maí, en þá fannst hópur dauðra fíla við ósa Okavango-fljótsins. Mynd er úr safni.
Hin dularfullu dauðsföll hafa átt sér stað frá í byrjun maí, en þá fannst hópur dauðra fíla við ósa Okavango-fljótsins. Mynd er úr safni. Getty

Rúmlega 350 fílar hafa drepist í norðurhluta Afríkuríkisins Botsvana síðustu mánuðina. Enn hefur ekki komið fram opinber skýring á dauða fílanna og hafa tafir orðið á sýnatöku fulltrúa yfirvalda.

Hin dularfullu dauðsföll hafa átt sér stað frá í byrjun maí, en þá fannst hópur dauðra fíla við ósa Okavango-fljótsins. Guardian hefur eftir ónafngreindum heimildarmönnum að hræ um 70 prósent fílanna hafi fundist við vatnsból.

Óljóst hvað veldur

Niall McCann, yfirmaður hjá bresku velgjörðarsamtökunum National Park Rescue, segir í samtali við Guardian að fjöldadauði fílanna sé af slíkri stærðargráðu að annað eins hafi ekki sést í langan tíma.

Yfirvöld í Botsvana hafa enn ekki ráðist í sýnatöku svo að óljóst er hvað það er sem veldur dauða dýranna.

Mögulega eitthvað sem ræðst á taugakerfið

McCann segir í samtali við BBC að hann telji ekki að þeir hafi drepist vegna miltisbrands, sem leiddi til dauða um hundrað fíla í Botsvana á síðasta ári. Sömuleiðis sé ólíklegt að eitrað hafi verið fyrir þeim þar sem svo virðist sem að dýrin sem hafi gætt sér á hræjum fílanna hafi ekki veikst eða drepist.

Sú staðreynd að mörg dýranna hafi fallið fram fyrir sig og drepist, auk þess að sést hafi til fílanna ganga í hringi áður en þau drápust, bendi til að um sé að ræða eitthvað sem ráðist á taugakerfi fílanna, að mati McCann.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.