Víða verður bjartviðri og mjög hlýtt í dag en þó dálítil rigning eða skúrir og svalt á Norðaustur- og Austurlandi. Þá verður nokkuð hvasst um landið norðvestanvert og einnig suðaustanlands.
Hlýjast verður suðvestanlands í dag og búast má við að hiti fari yfir 20 stig í höfuðborginni síðdegis, einkum í efri byggðum. Þá má gera ráð fyrir að á stórum svæðum í uppsveitum Árnessýslu, Borgarfirði og á Mýrum verði allt að 22 stiga hiti.
Öllu kaldara er þó á Norðausturlandi, þar sem gætti mikilla hlýinda í gær. Hiti á svæðinu verður víðast hvar undir tíu gráðum í dag.
Hlýindin á suðvesturhluta landsins vara ekki lengi en á morgun kólnar nokkuð á svæðinu og verður hiti í höfuðborginni á bilinu 8-13 stig.
Norðaustlæg eða breytileg átt, 3-10 m/s, með súld eða lítilsháttar rigningu suðvestanlands en yfirleitt léttskýjað á Norðurlandi. Hiti 8 til 17 stig, hlýjast norðvestantil á landinu. Á miðvikudag er svo útlit fyrir fremur hæga norðanátt með björtu veðri, en stöku skúrir sunnanlands.
Veðurhorfur á landinu næstu daga
Á þriðjudag:
Norðaustlæg eða breytileg átt 3-8 m/s. Bjart veður N-lands, annars skýjað og súld eða dálítil rigning SV-til. Hiti 8 til 17 stig, hlýjast á N- og V-landi.
Á miðvikudag og fimmtudag:
Norðan 3-8 og víða léttskýjað, en skýjað við NA-ströndina og stöku skúrir á S-landi. Hiti frá 7 stigum á annesjum NA-lands, upp í 17 stig S- og V-lands.
Á föstudag:
Norðaustanátt og bjart með köflum V-lands, annars skýjað en úrkomulítið. Hiti 6 til 15 stig, mildast á SV-landi.
Á laugardag:
Norðlæg átt, stöku skúrir og heldur kólnandi.
Á sunnudag:
Breytileg átt, skýjað með köflum og milt veður.
