Innlent

Skíðasvæði í Ölpunum skilgreind sem svæði með mikla smitáhættu

Sunna Kristín Hilmarsdóttir skrifar
Fjölmörg skíðasvæði eru nú skilgreind sem áhættusvæði vegna kórónuveirunnar af íslenskum yfirvöldum.
Fjölmörg skíðasvæði eru nú skilgreind sem áhættusvæði vegna kórónuveirunnar af íslenskum yfirvöldum. Grafík/Hjalti

Tekin hefur verið ákvörðun um það að skilgreina skíðasvæði í Ölpunum sem svæði með mikla smitáhættu vegna kórónuveirunnar sem veldur sjúkdómnum COVID-19. Frá þessu var greint á upplýsingafundi almannavarna og landlæknis sem hófst klukkan 14 í dag.

Svæðin eru skilgreind sem hættusvæði frá og með 29. febrúar síðastliðnum en að því er fram kemur á vef landlæknis eru landsvæðin eftirfarandi:

Ítalía

  • Allt landið

Austurríki

  • Ischgl
  • Vorarlberg
  • Tirol
  • Salzburg
  • Kärnten

Sviss

  • Valais
  • Bernese Oberland
  • Ticino
  • Graubünden

Þýskaland

  • Skíðasvæði í Suður-Bæjaralandi

Frakkland

  • Provence-Alpes-Côte d'Azur
  • Auvergne-Rhône-Alpes

Slóvenía

  • Öll skíðasvæði

Þórólfur Guðnason, sóttvarnalæknir, sagði á fundinum að þessi ákvörðun byggi á aukaupplýsingum sem yfirvöld hafi verið að fá yfir helgina.

Vísaði hann í fregnir frá Norðurlöndunum þar sem mjög stór hluti af þeim sýkingum sem eru að greinast þar eru að koma frá skíðasvæðum í Ölpunum og þá ekki bara frá Norður-Ítalíu.

Því væri almenningur nú hvattur til þess að fara ekki á skíðasvæði í Ölpunum að nauðsynjalausu og ef fólk hefur verið þar þá eigi það að fara í sóttkví frá heimkomudegi.

Verið væri að miða við 29. febrúar og ákvörðunin gildir frá þeim degi. Tók Þórólfur dæmi um að ef einhver hefði komið heim fyrir tíu dögum frá nú skilgreindum áhættusvæðum en verið einkennalaus þá eigi viðkomandi að fara í sóttkví í fjóra daga.

Fréttin hefur verið uppfærð.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×