Stálbrú frá 1899 fær andlitslyftingu

„Það kemur eitt og eitt svona verkefni þar sem verið er að halda við minjum áður en þær fara í vaskinn," segir Guðmundur Sigurðsson brúarsmiður, sem nú annast endursmíði nítjándu aldar stálbrúar í Borgarfirði.

Endurnýjun brúarinnar við kirkjuna í Norðtungu í Þverárhlíð hófst í raun fyrir um fimm árum þegar stálvirki hennar var endursmíðað. Verkið er á snærum minjadeildar Vegagerðar ríkisins. Nú í sumar þótti lag að skipta út gamla stálinu sem var ónýtt og koma því nýja fyrir. „Nú eru menn í því að raða þessu saman og hreinsa steypu utan af gömlum grjóthleðslum þannig að brúin verður eins og hún var. Burðarvirkið, kaplar og festur eru hins vegar upprunaleg og í góðu lagi," segir Guðmundur.

Brúin yfir Örnólfsdalsá var smíðuð 1899 og er því 112 ára. Hún er ekki lengur í vegasambandi. „Það er verið að lagfæra í kring um kirkjuna í Norðtungu og brúin verður einfaldlega gönguleið yfir ána, sem minjar um fyrri tíð," segir Guðmundur sem segir að endurnýjuninni eiga að ljúka áður en september er á enda. -gar