Adebayor óhress með rauða spjaldið (myndband)

"Hann kastaði sér niður eins og ég hefði stungið hann með hníf," sagði Emmanuel Adebayor hjá Arsenal um atvikið þegar hann var rekinn af velli gegn Liverpool í gær.

Liðin gerðu 1-1 jafntefli í gær en það breytti nokkuð gangi leiksins þegar Adebayor var rekinn af velli um miðbik síðari hálfleiksins.

Hann fékk þá að líta sitt annað gula spjald eftir viðskipti sín við Alvaro Arbeloa og furðaði sig á ákvörðun Howard Webb dómara eins og reyndar margir fleiri.

Smelltu hér til að sjá samantekt um leik Arsenal og Liverpool

"Ég vona að dómarinn sjái að ég hafi ekki átt skilið rautt spjald þegar hann kemur heim og sér þetta í sjónvarpinu," sagði Adebayor í samtali við Sun.

Hann var spurður hvort hann væri argur vegna atviksins.

"Auðvitað er ég gramur. Ég get ekki gengið svo langt að segja að hann hafi leitt mig í gildru viljandi, en þetta var ekki sanngjarnt. Dómarinn sagði að hann hefði gefið mér spjaldið út af tæklingunni, en ef ég set aldrei út fótinn mun ég skora mark í þessari deild," sagði Adebayor.