Gerrard: Leikurinn mun ganga af mér dauðum

Steven Gerrard, leikmaður Liverpool og enska landsliðsins, segir að hann muni horfa á leik Ísraela og Rússa en að það muni ganga af honum dauðum.

Ef Rússland vinnur leikinn á laugardaginn á England enga möguleika að komast í úrslitakeppni EM 2008 í Austurríki og Sviss á næsta ári.

„Málið er einfaldlega það að það hefur vantað stöðugleika í landsliðið í þessari undankeppni," sagði Gerrard. „Annars værum við ekki komnir í þessa stöðu."

Gerrard hefur áður sagt að enski landsliðshópurinn hefur aldrei verið sterkari en nú á sínum landsliðsferli. Hann stendur við þá fullyrðingu enn í dag.

„Ef við komumst ekki í úrslitakeppnina verður erfitt að vita af því að við erum með eitt besta liðið í Evrópu sem ætti góðan möguleika á því að vinna titilinn."