Jol var rekinn

Tottenham sendi í kvöld frá sér tilkynningu þar sem sérstaklega var tekið fram að Martin Jol hafi verið rekinn úr starfi sínu sem knattspyrnustjóri.

Fregnir af því að Jol væri að hætta bárust á meðan leik Tottenham og Getafe í UEFA-bikarkeppninni stóð í kvöld. Þá var sagt frá málinu þannig að Jol hafi sagt starfi sínu lausu áður en leikurinn hófst.

Stjórn Tottenham sendi frá sér tilkynninguna seint í kvöld. En þrátt fyrir að hann hafi verið rekinn stóð hann samt á hliðarlínunni á White Hart Lane í kvöld.

Það var svo fullyrt á stuðningsmannasíðu Middlesbrough að Martin Jol myndi verða ráðinn til aðstoðar Gareth Southgate, stjóra liðsins.  

„Ég skil vel afstöðu félagsins í ljósi árangursins," sagði Jol í yfirlýsingu á heimasíðu Tottenham í kvöld. „Ég hef notið mín hér. Tottenham er sérstakt félag og vil ég þakka hinu frábæra starfsliði hér og leikmönnunum."

Hann þakkaði stuðningsmönnum einnig kærlega fyrir og sagðist aldrei muna gleyma þeim.

Á sunnudag verður Clive Allen við stjórnvölinn þegar Tottenham mætir Blackburn í ensku úrvalsdeildinni.