Kvöldfréttir Stöðvar 2

Ungu fólki sem lagt er inn á bráðadeild vegna lyfjaeitrunar hefur fjölgað um fjörutíu prósent á síðustu fimm árum. Mikið er um að fólk blandi saman kókaíni og lyfseðilsskyldum lyfjum, sem er stórhættulegt að mati yfirlæknis. Nánar um þetta í kvöldfréttum okkar.

Ríkislögreglustjóra er skylt að innheimta árlega um 200 milljónir króna umfram rekstrarkostnað lögreglubifreiða í ríkissjóð. Svo virðist sem nokkuð misræmi sé í málflutningi embættisins um málefni bílamiðstöðvar sem ákveðið hefur verið að loka.

Forsætisráðherra flytur stefnuræðu sína fyrir komandi þingvetur á Alþingi í kvöld. Allir formenn flokka á Alþingi taka til máls í kvöld nema Bjarni Benediktsson, fjármálaráðherra. Við verðum í beinni útsendingu frá Alþingi.

Tveir þriðju þeirra sem fá ígrætt nýra hér á landi fá það frá lifandi einstaklingi sem er mun hærra hlutfall en almennt tíðkast í Evrópu. Ungur maður sem gaf nýra fyrir rúmri viku segir afar gefandi að vita hversu mikla þýðingu það hafði fyrir þann sem þáði nýrað.

Við segjum frá íslenskum verkfræðingi sem er orðinn verkefnastjóri grænlenskra stjórnvalda yfir mestu innviðauppbyggingu í sögu Grænlands, nágrannaþjóðar Íslendinga, tökum stöðuna í Brexit og sýnum viðbrögð Palestínumanna við yfirlýsingum Benjamíns Netanjahú um innlimun hluta Vesturbakkans í Ísrael verði hann kosinn á ný.

Þetta og margt fleira í kvöldfréttum okkar á samtengdum rásum Stöðvar 2, Vísis og Bylgjunnar á slaginu 18:30.