Frank Lampard gæti orðið næsti stjóri Chelsea

Frank Lampard gæti verið á leiðinni aftur á Stamford Bridge ef marka má slúðrið í enskum fjölmiðlum í morgun.

Eftir dapurt gengi að undanförnu er talið nokkuð ljóst að Ítalinn Maurizio Sarri fá ekki að stýra Chelsea liðinu mikið lengur. Liðið er bara í sjötta sæti í ensku deildinni en eina vonin um titil á tímabilinu og jafnvel sæti í Meistaradeildinni er að vinna Evrópudeildina þar sem liðið er komið í átta liða úrslit.

Ensku blöðin eru því strax farin að velta sér upp úr hver fái starfið hans Maurizio Sarri í sumar.

Í morgun slær Sun því upp að þeir Nuno Espirito Santo, stjóri Wolves, og Frank Lampard, stjóri Derby, séu efstir á óskalistanum hjá Chelsea.

Derby County fans look away now!

Could Frank Lampard be returning to Chelsea sooner than expected?

It's in the latest football gossip ⬇https://t.co/Dy6USeuJq3pic.twitter.com/5U7hb2jK1x

— BBC Sport (@BBCSport) March 22, 2019

Frank Lampard er fertugur og tók við liði Derby County í maí í fyrra. Lampard gerði þá þriggja ára samning við félagið.

Derby er eins og er í 8. sæti í ensku b-deildinni en á leik inni á liðin fyrir ofan sem eru jafnframt aðeins með stigi meira en lærisveinar Lampard. Lampard gæti því komist í umspilið um sæti í ensku úrvalsdeildinni.

Frank Lampard er ein af stærstu goðsögnum í sögu Chelsea og væri örugglega mjög vinsæll kostur meðal stuðningsmanna félagsins.

Lampard er markahæsti leikmaður Chelsea frá upphafi með 211 mörk í keppnisleikjum fyrir félagið frá 2001 til 2014. Hann er jafnframt sá fjórði leikjahæsti með 648 leiki.

Frank Lampard vann þrettán titla með Chelsea þar af ensku deildina þrisvar sinnum (2005, 2006, 2010), enska bikarinn fjórum sinnum (2007, 2009, 2010, 2012) og þá vann hann bæði Meistaradeildina (2012) og Evrópudeildina (2013) með Chelsea.

Nuno Espirito Santo hefur á móti gert frábæra hluti með lið Wolves á þeirra fyrsta tímabili í ensku úrvalsdeildinni. Liðið er í sjöunda sæti í deildinni og tryggði sér á dögunum sæti í undanúrslitum enska bikarsins með sigri á Manchester United.

Úlfarnir hafa náð í 4 stig á móti Chelsea í tveimur deildarleikjum liðanna í vetur en Wolves vann 2-1 á heimavelli og gerði svo 1-1 jafntefli á Stamford Bridge fyrr í þessum mánuði.