Liðin sem gefa ungum leikmönnum flestar mínútur í ensku úrvalsdeildinni

Leicester City er með yfirburðarstöðu í ensku úrvalsdeildinni þegar kemur að því að leyfa ungum leikmönnum að spila. Allt aðra sögu er að segja af liði Cardiff City.

Það getur verið áhættusamt að veðja á ungan og óharðnaðann leikmann í stað þess að spila reyndari og eldri leikmönnum. Það getur aftur á móti gert mikið fyrir framtíð félagsins. Oftast er það þó nútíðin sem allt snýst um hjá liðunum í bestu deild í heimi.

BBC Sport skoðaði betur hvaða lið í ensku úrvalsdeildinni hafa þorað að gefa ungum leikmönnum tækifæri á þessu tímabili. Algjörar andstæður eru lið Leicester City og Cardiff City. Arsenal, Liverpool og Manchester United koma líka mun betur út en Manchester City og Chelsea.

Does your club give youth a chance?

We take a look at how every Premier League club has used players under the age of 22.https://t.co/HOoRvZbhHIpic.twitter.com/B5ursCwM5U

— BBC Sport (@BBCSport) January 29, 2019

Leicester City er reyndar í algjörum sérflokki og þó að stjórastóllinn hans Claude Puel sé orðinn mjög heitur þá er hann að hugsa til framtíðar og gefa ungum leikmönnum mínútur.

Alls hafa leikmenn 22 ára og yngri spilað í 8373 mínútur hjá Puel í vetur sem er næstum tvöfalt meira en hjá liðinu í öðru sæti sem er Arsenal með 4467 mínútur. Arsenal er samt langefst af „stóru“ liðunum í deildinni.

Það er fróðlegt að skoða aðeins betur þessa ungu leikmenn Leicester City en þar hefur Wilfred Ndidi spilað mest eða 2038 mínútur. Ben Chilwell er annar ungur leikmaður sem fær tækifærið hjá Leicester en hann er með 1980 mínútur. Engir leikmenn 22 ára og yngri hafa spilað meira.

Í næstu sætum á leikmannalistanum koma síðan Aaron Wan-Bissaka hjá Crystal Palace (1965 mínútur), Issa Diop hjá West Ham (1890) og Phillip Billing hjá  Huddersfield (1842 mínútur).

Gylfi Þór Sigurðsson og félagar í Evertin eru í þriðja sæti á lista félaganna með 4455 mínútur, nokkuð á undan West Ham og Tottenham sem eru í næstu sætum.

Bæði Liverpool og Manchester United skríða inn í efri hlutann en United er rétt yfir tvö þúsund mínútum. Liverpool er tveimur sætum ofar og með meira en 500 fleiri mínútur.

Manchester City er hins vegar aðeins í 15. sætinu en það er þó ekkert miðað við Chelsea sem er í næst neðsta sæti.

Maurizio Sarri hefur aðeins gefið tveimur leikmönnum 22 ára og yngri tækifæri á leiktíðinni og þeir hafa jafnframt aðeins spilað í samtals 151 mínútu. Þetta eru þeir Callum Hudson-Odoi og Andreas Christensen.

Á botninum er aftur á móti Cardiff City en knattspyrnustjórinn Neil Warnock hefur enn ekki hleypt leikmanni inn á völlinn sem er ekki orðinn 23 ára gamall.

Hér fyrir neðan má sjá listann hjá BBC:

1. Leicester    8373 mínútur

2. Arsenal    4467    

3. Everton    4455    

4. West Ham    4134

5. Tottenham    4083

6. Wolves    3962

7. Huddersfield    3089

8. Liverpool    2553

9. Bournemouth    2400

10. Man Utd    2009

---

11. Fulham    1975

12. Crystal Palace    1965

13. Southampton    1671

14. Newcastle    1409

15. Man City    1107

16. Brighton    863

17. Burnley    440

18. Watford    296

19. Chelsea    151

20. Cardiff    0