Kosningaslagur þriggja jólatrjáa
Þrjú tré á Húsavík keppa nú um hylli íbúanna sem eiga þess kost að velja jólatré bæjarins þetta árið.
Samkvæmt upplýsingum á skrifstofu Norðurþings hefur í nokkur ár verið farin sú leið að nota jólatré fyrir Húsavík úr einkagörðum þeirra sem viljað hafa losna við trén.
Nú bregði svo við að þrjú slík tré séu í boði. Því hafi verið farin sú leið að leyfa bæjarbúum að velja hvaða tré verður hoggið.
„Við viljum biðja fólk að virða það að trén eru í einkagörðum og því ber að sýna nærgætni við skoðun,“ segir á vef Norðurþings. Kosningin hófst í gær og verður hið útvalda jólatré sett upp á litlu torgi við Búðará laugardaginn 30. nóvember.
Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.
