Ef Íslendingar komast á EM verða þeir með Þjóðverjum í riðli

Ef Ísland kemst á EM 2020 verður liðið í F-riðli með Þýskalandi og tveimur öðrum liðum.

Dregið var um þetta í dag. Sigurvegarinn í A-umspilinu (Ísland, Rúmenía, Búlgaría eða Ungverjaland) verður í F-riðlinum með Þýskalandi.

Allir leikir Þjóðverja fara fram á Allianz Arena, heimavelli Þýskalandsmeistara Bayern München.

Ef Ísland kemst á EM leikur liðið því einn leik á Allianz Arena. Hinir tveir fara fram á Puskás Arena í Búdapest, nýjum og glæsilegum þjóðarleikvangi Ungverja.

Ísland mætir Rúmeníu á Laugardalsvelli í undanúrslitum umspilsins 26. mars 2020. Sigurvegarinn mætir annað hvort Búlgaríu eða Ungverjalandi í úrslitaleik umspilsins. Úrslitaleikurinn fer fram í Sofíu eða Búdapest.