Erlent

Lækka hraða vegna mengunar

Kristinn Haukur Guðnason skrifar
Bændur mótmæltu nýlega hertum reglum um útblástur.
Bændur mótmæltu nýlega hertum reglum um útblástur. Vísir/getty

Ríkisstjórn Hollands hefur ákveðið að lækka hámarkshraða á þjóðvegum landsins til að draga úr útblæstri og mengun. Forsætisráðherrann, Mark Rutte, segir þetta vera stórt skref í að takast á við mikla nituroxíðmengun.

Í dag er hámarkshraðinn á þjóðvegum Hollands 130 kílómetrar á klukkustund en hann verður lækkaður strax á næsta ári niður í 100. Eftir breytinguna mun Holland verða með einhvern lægsta hámarkshraða á meginlandi Evrópu.

Útblástur er mikið vandamál í Hollandi og landið hefur ekki náð markmiðum Evrópusambandsins í þeim efnum. Innviðauppbygging, til að mynda í flugrekstri og vegauppbyggingu, hefur tafist vegna þessa en Rutte segir að með hraðabreytingunni verði hægt að spýta í lófana á ný.

Hingað til hefur sökinni á miklum útblæstri að stórum hluta verið skellt á bændur. Í október keyrðu þeir á dráttarvélum í öllum helstu borgum landsins til að mótmæla hertum útblástursreglum. Samband bílasala í Hollandi gagnrýnir áætlanir stjórnvalda og segja þær skila litlu í stóra samhenginu. Umhverfissamtök hafa hins vegar fagnað þeim og segja þær skref í rétta átt.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.