Erlent

Sendiherra ekki viss um hvort Trump sagði satt um Úkraínu

Kjartan Kjartansson skrifar
Trump fól Sondland (t.h.) að fara með mál sem tengjast Úkraínu þrátt fyrir að hann sé sendiherrann gagnvart Evrópusambandinu. Úkraína er ekki hluti af sambandinu.
Trump fól Sondland (t.h.) að fara með mál sem tengjast Úkraínu þrátt fyrir að hann sé sendiherrann gagnvart Evrópusambandinu. Úkraína er ekki hluti af sambandinu. AP/Pablo Martinez Monsivais

Gordon Sondland, sendiherra Bandaríkjanna við Evrópusambandið, er sagður ætla að segja þingnefnd í vikunni að hann viti ekki hvort að Donald Trump Bandaríkjaforseti hafi sagt satt þegar hann fullyrti að engin „kaup kaups“ hefðu átt sér stað í samskiptum hans við forseta Úkraínu í sumar. Sondland var einn helsti tengiliður Trump við Úkraínu þegar hann þrýsti á stjórnvöld þar að rannsaka pólitískan andstæðing hans.

Þrýstingur Trump á Volodímír Zelenskíj, forseta Úkraínu, um að hann rannsakaði Joe Biden, fyrrverandi varaforseta Bandaríkjanna og líklegan keppinaut Trump í forsetakosningum á næsta ári, varð til þess að demókratar sem fara með meirihluta í fulltrúadeild Bandaríkjaþings hófu formlega rannsókn á mögulegum embættisbrotum forsetans.

Rannsóknin beinist meðal annars að því hvort að Trump hafi notað fund sem Zelenskíj sóttist eftir með honum og hundruð milljón dollara hernaðaraðstoð sem skiptimynt gegn því að stjórnvöld í Kænugarði rannsökuðu Biden og stoðlausa samsæriskenningu um að það hafi í raun verið Úkraínumenn, ekki Rússar, sem reyndu að hafa áhrif á forsetakosningarnar í Bandaríkjunum árið 2016. Úkraínumenn hafa um margt verið háðir stuðningi Bandaríkjastjórnar í átökum við uppreisnarmenn sem eru hliðhollir Rússum í austanverðu landinu.

Textaskilaboð sem fóru á milli Sondland, Kurt Volker, þáveranda sendifulltrúa Bandaríkjanna vegna átakanna í Austur-Úkraínu, og Bill Taylor, hæst setta sendifulltrúa Bandaríkjanna í Úkraínu, í sumar og haust benda til þess að þeir hafi talið fund Trump og Zelenskíj skilyrtan við að Úkraínumenn gæfu út að þeir rannsökuðu Biden.

Taylor virðist einnig hafa talið að hernaðaraðstoðin væri bundin við að Úkraínumenn gerðu Trump pólitískan greiða. Trump ákvað að halda eftir um 400 milljóna dollara hernaðaraðstoð við Úkraínu skömmu áður en hann ræddi við Zelenskíj 25. júlí. Engar skýringar hafa verið gefnar á því hvers vegna það var gert.

Uppljóstrari innan leyniþjónustunnar lagði fram formlega kvörtun til innri endurskoðanda leyniþjónustunnar um að Trump hefði mögulega misbeitt valdi sínu þegar hann þrýstí á Zelenskíj í símtalinu. Hvíta húsið hafi jafnframt reynt að halda innihaldi símtalsins leyndu með því að koma eftirriti af því fyrir í tölvukerfi sem er ætlað fyrir háleynilegar upplýsingar.

Skilaboð sem fóru á milli Bill Taylor, staðgengill sendiherra í Úkraínu, og Sondland í september. Svar Sondland kom beint frá Trump forseta. Vísir/AP

Neitunin kom beint frá Trump forseta

Sondland kvað niður umræðuna í textaskilaboðunum eftir að Taylor sagði „sturlað“ að hernaðaraðstoð yrði skilyrt við aðstoð við stjórnmálaframboð Trump. Fullyrti Sondland að Trump hefði verið skýr um að „engin kaup kaups“ ættu sér stað.

Í skriflegri yfirlýsingu sem Sondland er sagður ætla að leggja fyrir þegar hann kemur fyrir þingnefnd sem rannsakar möguleg embættisbrot Trump í vikunni er búist við hann segi að þau ummæli hafi komið beint frá Trump forseta.

Eftir að Taylor sendi skilaboðin þar sem hann tengdi hernaðaraðstoðina við pólitískan greiða talaði Sondland við Trump í síma. Svarið sem Sondland sendi Taylor hafi verið nær orðrétt það sem Trump sagði honum.

Sondland ætlar að segja þingnefndinni að hann viti hins vegar ekki um sannleiksgildi þeirrar fullyrðingar forsetans.

„Það er aðeins satt að forsetinn sagði það, ekki að það hafi verið satt,“ segir Washington Post að muni koma fram í yfirlýsingu Sondland.

Sendiherrann er sagður ætla að neita því að hafa vitað af því að kröfur Trump og Rudy Giuliani, persónulegs lögmanns forsetans, um rannsókn á „spillingu“ í Úkraínu hefði nokkuð með Biden og son hans Hunter að gera. Hunter Biden sat í stjórn úkraínsks olíufyrirtækis á þeim tíma sem Biden krafðist þess að úkraínsk stjórnvöld rækju saksóknara sem vestræn ríki töldu hafa brugðist í að uppræta spillingu. Trump og bandamenn hans hafa vænt Biden-feðgana um spillingun án nokkurra sannana.

Washington Post bendir á að ef það sé satt að Sondland hafi ekki vitað um tenginguna við Biden hafi hann þurft að hafa misst af ítrekuðum sjónvarpsviðtölum við Giuliani í vor og sumar og fjölda blaðagreina sem fjölluðu um Biden og Úkraínu. Sondland var meðal annars í samskiptum við Giuliani um að þrýsta á Úkraínumennina.

Þrátt fyrir að Sondland ætli að staðfesta að fundur Trump og Zelenskíj hafi verið skilyrtur við að úkraínsk stjórnvöld lýstu því yfir að þau rannsökuðu Biden neitar hann að það hafi verið óeðlilegt.

„Þetta voru kaup kaups en ekki spillt,“ er Sondland sagður ætla að segja.

Yovanovitch bar vitni í níu klukkustundir fyrir luktum dyrum hjá þingnefnd á föstudag. AP/Manuel Balce Ceneta

Sagði Trump hafa látið bola sér burt

Sondland er sagður ætla að koma fyrir þingnefndina á fimmtudag þrátt fyrir að utanríkisráðuneytið hafi bannað honum að bera vitni í síðustu viku.

Á föstudag bar Marie Yovanovitch, sem var skyndilega kölluð heim sem sendiherra Bandaríkjanna í Úkraínu í vor, vitni fyrir nefndinni. Þar fullyrti hún að Trump hefði persónulega þrýst á utanríkisráðuneytið að bola henni úr embætti.

Giuliani og fleiri í innri hring forsetans höfðu í aðdraganda þess að Yovanovitch var kölluð heim sakað hana um að vera ekki holl Trump og að tala illa um hann á bak við luktar dyr. Sendiherrann sagði að „samhæfð herferð“ hefði átt sér stað gegn henni sem hafi byggst á „stoðlausum og fölskum fullyrðingum fólks með klárlega vafasamar hvatir“.

Á miðvikudag voru tveir viðskiptafélagar Giuliani sem aðstoðuðu hann við að þrýsta á úkraínsk stjórnvöld handteknir á flugvelli í Washington-borg. Þeir eru sagðir grunaðir um brot á lögum um fjármál stjórnmálaframboða með því að hafa þvættað fé frá erlendum aðilum sem var gefið til Repúblikanaflokksins og pólitískra aðgerðanefnda sem styðja Trump forseta.


Tengdar fréttir

Segir Trump hafa ýtt á eftir því að henni yrði vikið úr starfi sendiherra í Úkraínu

Donald Trump Bandaríkjaforseti þrýsti á Utanríkisráðuneyti Bandaríkjanna að víkja sendiherra Bandaríkjanna í Úkraínu úr embætti sínu. Frá þessu greindi fyrrverandi sendiherrann Marie Yovanovitch í yfirheyrslum vegna rannsóknar Bandaríkjaþings á meintum brotum Trump í starfi er viðkoma Úkraínu-skandalnum sem tröllríður pólítískri umræðu vestanhafs.

Samverkamenn Giuliani voru gómaðir með flugmiða til Vínar

Tveir samverkamenn Rudy Giuliani, einkalögmanns Donald Trump, sem voru handteknir í gær vegna gruns um að þeir hafi brotið lög um fjármál stjórnmálaframboða, voru handteknir á flugvelli með flugmiða aðra leiðina til Vínar í Austurríki.

Tveir samverkamenn Giuliani vegna Úkraínu handteknir

Mennirnir tveir aðstoðuðu persónulegan lögmann Trump forseta við að koma á fundum við úkraínska embættismenn sem þeir vildu að fyndu skaðlegar upplýsingar um pólitískan mótherja forsetans.

Banna lykilvitni að koma fyrir þingnefnd

Sendiherra Bandaríkjanna gagnvart ESB sem sá um samskipti Trump-stjórnarinnar við Úkraínu ber ekki vitni í dag eins og til stóð samkvæmt ákvörðun utanríkisráðuneytisins.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.