Erlent

Tveir samverkamenn Giuliani vegna Úkraínu handteknir

Kjartan Kjartansson skrifar
Giuliani naut fulltingis Parnas og Fruman við að koma á fundum við úkraínska embættismenn sem hann vildi að fyndu skaðlegar upplýsingar um Joe Biden.
Giuliani naut fulltingis Parnas og Fruman við að koma á fundum við úkraínska embættismenn sem hann vildi að fyndu skaðlegar upplýsingar um Joe Biden. AP/Andrew Harnik

Bandarísk yfirvöld handtóku í gær tvo bandamenn Rudy Giuliani, persónulegs lögmanns Donalds Trump Bandaríkjaforseta, vegna gruns um að þeir hafi brotið lög um fjármál stjórnmálaframboða. Tvímenningarnir aðstoðu Giuliani í tilraunum hans til að fá úkraínsk stjórnvöld til að rannsaka Joe Biden, líklegan mótframbjóðanda Trump forseta.

Mennirnir tveir hafa verið fjárhagslegir styrktaraðilar Repúblikanaflokksins og pólitískra aðgerðanefnda sem tengjast Trump forseta. Wall Street Journal segir að þeir eigi að koma fyrir dómara í Virginíu í dag. Báðir mennirnir eru bandarískir borgarar frá Flórída en fæddust í fyrrum Sovétlýðveldum. Þeir eru sagðir hafa verið til rannsóknar hjá alríkissaksóknara í Manhattan.

AP-fréttastofan sagði frá því fyrr í vikunni að þeir Lev Parnas og Igor Fruman hefðu reynt að koma ár sinni fyrir borð hjá stóru úkraínsku orkufyrirtæki á sama tíma og þeir aðstoðuðu Giuliani við að koma á fundum með úkraínskum embættismönnum til að þrýsta á þá að rannsaka Biden. Giuliani og Trump hafa sakað Biden um spillingu í Úkraínu án sannana.

Þeir Parnas og Fruman eru báðir skjólstæðingar Giuliani. Þeir hafa gefið jafnvirði milljóna íslenskra króna í sjóði repúblikana og hópa sem eru hliðhollir Trump. Wall Street Journal segir að ekki liggi fyrir um hvað ákærurnar á hendur þeim snúast nákvæmlega.

Washington Post segir að mennirnir séu ákærðir fyrir að leggja á ráðin um að „fara í kringum alríkislög sem banna erlend áhrif með því að eiga í ráðabruggi um að koma erlendum fjármunum til frambjóðenda til alríkis- og ríkisembætta til þess að sakborningarnir gætu mögulega haft áhrif á frambjóðendurna, framboðin og ríkisstjórnir frambjóðendanna“.

John Dowd, sem fór fyrir lögfræðingateymi Trump forseta, til vorsins 2018 er lögmaður mannanna. Hann svaraði ekki fyrirspurnum WSJ. Blaðið segir að félagasamtök sem berjast fyrir gegnsæi hafi hvatt Alríkiskjörnefnd Bandaríkjanna (FEC) til að rannsaka hvort Parnas og Fruman hefðu brotið kosningalög þegar þeir notuðu einkahlutafélög til að fela uppruna fjárframlaga þeirra til repúblikana og aðgerðanefnda sem tengjast Trump.

Skjáskot af Facebook-færslu Parnas frá því í maí. Á myndina sést hann sjálfur (2.f.h.) með Fruman (lengst til hægri), Donald Trump yngri, syni Trump forseta (lengst til vinstri) og Tommy Hicks yngri, varaformanni landsnefndar Repúblikanaflokksins. Vísir/AP

New York Times segir að tveir aðrir menn hafi verið ákærðir með Parnas og Fruman, þeir David Correia og Andrei Kukusjkin. Blaðið segir að þeir Parnas og Kukusjkin séu fæddir í Úkraínu en Fruman hafi fæðst í Hvíta-Rússlandi en síðar orðið bandarískur ríkisborgari. Correia sé fæddur í Bandaríkjunum. Correia hafi verið handtekinn í Kaliforníu í dag en Kukusjkin gangi enn laus.

Parnas og Fruman eru sagði stjórnendur orkufyrirtæki á Suður-Flórída sem hafi gefið 325.000 dollara í pólitíska aðgerðanefnd sem styður Trump í fyrra.

Giuliani var spurður út í rannsókn á tvímenningum vegna mögulegra kosningalagabrota í síðasta mánuði.

„Ég vísaði þeim á sérfræðing í fjármálum stjórnmálaframboða sem leysti þetta eiginlega bara,“ sagði Giuliani þá.

Nicholas Fandos, þingfréttaritari New York Times, bendir á að Parnas hafi átt að bera vitni fyrir þingnefnd sem rannsakar möguleg embættisbrot Trump forseta í tengslum við samskipti hans við úkraínsk yfirvöld. Fruman hafi átt að koma fyrir nefndina á morgun. Ekki hafi þó verið búist við því að þeir kæmu sjálfviljugir fyrir nefndina sem hafi lagt drög að stefnu á hendur þeim.



Fréttin hefur verið uppfærð.


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.