Fótbolti

Lazio bjargaði stigi á heimavelli

Ástrós Ýr Eggertsdóttir skrifar
Ciro Immobile var allt í öllu í endurkomu Lazio
Ciro Immobile var allt í öllu í endurkomu Lazio vísir/getty
Lazio kom til baka gegn Atalanta og náði í jafntefli í mikilvægum leik í toppbaráttunni í ítölsku úrvalsdeildinni.



Gestirnir frá Atalanta komust yfir eftir 23 mínútur með marki Luis Muriel og eftir fimm mínútur bætti hann öðru marki við.



Alejandro Gomez skoraði þriðja mark Atalanta á 37. mínútu og voru gestirnir í þægilegri stöðu í hálfleik.



Á 69. mínútu skoraði Ciro Immobile fyrir heimamenn í Lazio úr vítaspyrnu eftir að Jose Palomino var dæmdur brotlegur innan vítateigs. Aðeins mínútu síðar kom annað mark Lazio, Joaquin Correa skoraði eftir fyrirgjöf Immobile.



Í uppbótartíma fékk Lazio svo fullkomið tækifæri til þess að jafna leikinn þegar vítaspyrna var dæmd á Atalanta. Immobile fór aftur á punktinn og skoraði aftur.



Lokatölur urðu 3-3 í fjörugum leik.



Atalanta er nú með 17 stig í þriðja sæti, tveimur stigum á eftir Juventus á toppnum. Lazio er í 6. sæti með 12 stig.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.